A Hneăng hôp, mâu kăn teăng mâ tơkŭm veăng tơpui mơ-éa chêh hdrối Tơbleăng kal kí ƀă 17 túa pơkâ pêi ki xiâm ƀă 5 khu hnoăng cheăng, troăng pêi cheăng ton xŏn. Hneăng hôp xuân môi tuăn ƀă tơdroăng tơkêa bro mơjiâng Đảng ƀô̆ kong pơlê Dak Lak (nếo) tiô tơdroăng ki tơmot chiâng môi Dak Lak ƀă Phú Yên.

Klêi kơ’nâi rah xo bro lế lĕm tro, lâp kong pơlê kô ai 108 khu tơrŭm cheăng Đảng ối tung Tĭnh ủy, ƀă dâng 136.750 đảng viên. Xông tơpui hneăng hôp, pôa Nguyễn Đình Trung, Kăn pơkuâ hnê ngăn cheăng Đảng kong pơlê Dak Lak pơkâ thế Tiêuh ƀan Mơ-éa ki kal tơmâng xo tŭm mâu rơkong veăng tơpui, pêi kêi đeăng mơ-éa ki kal tơbleăng Hneăng hôp. Tơdroăng mơnhông ki pơxúa dêi tŭm péa kong pơlê klêi kơ’nâi tơmot chiâng môi kal pêi pro ƀă mơnhông tâi tâng ƀă krá tơniăn.