A Khu rak ngăn tơdroăng tơkêa bro ‘no liăn mơjiâng tơring Čư̆ Mgar, tơdroăng pêi cheăng tung mâu hâi ki kố thâ pêi. Pôa Bùi Châu Lĩnh, Ngế pơkuâ Khu kăn, ăm ‘nâi, mâu kăn ƀô̆ thế pêi cheăng pa kong chôu pơkâ, tá hâi tơdrốu, hâi tĭng vâ teăng tơdroăng pơcháu mâu hồ sơ, hlá mơ-éa pêi:

“Ing mâu hơnăm pêi pro tơmeăm khoăng tơkêa bro mê kơxô̆ hồ sơ hên, mơhnhôk mâu ngoh o mơ-eăm pêi cheăng tâi ivá vâ pê klêi hnoăng cheăng tơdjuôm’’.

A mâu tíu pêi cheăng môi bo dêi Vi ƀan kuăn pơlê tơring Čư̆ Mgar- tíu tơdah ƀă pro mâu hlá mơ-éa, kơxô̆ hồ sơ tâk hên drêng kuăn pơlê mơdoh pro klêi hlá mơ-éa hdrối mâu kăn râ tơring vâ pơtê. Tơdrêng ƀă pê pro klêi mâu hlá mơ-éa troh hâi pơkâ, Khu pêi cheăng môi bo dêi tơring ối hnê nhên ‘na tơdroăng pro hlá mơ-éa tung hơnăm kô hiá ah, drêng mâu cheăm ki nếo pơxiâm pêi cheăng. Vi ƀan kuăn pơlê tơring Čư̆ Mgar xuân hbrâ mơhno xoăng nếo tíu pêi cheăng ƀă xoăng hnoăng cheăng pêi nhên ăm mâu ƀơrô vâ pôi tơdjâk pá troh tơdroăng cheăng vâ pro hlá mơ-éa ăm kuăn pơlê. Pôa Nguyễn Công Văn, Phŏ kăn hnê ngăn Vi ƀan tơring tối nhên:

“Ƀă mâu tơdroăng cheăng ‘na chêh pro hlá mơ-éa mê ngin hnê mơhno ăm mâu ƀơrô, mâu kơ koan ki pêi tơdroăng cheăng mê, ‘nâi nhên mâu tơdroăng pá ki lâi kal thế tah ƀă mâu tơdroăng ki pâ thế, tối vâ mơnhên. Mâu tơdroăng cheăng ki lâi chiâng pêi ăm rĕng mê thế pêi hlối, mâu tơdroăng ki hâi chiâng pêi rĕng kô lôi amê ‘nôi, xuân cho xiâm ki vâ pơtối pơcháu ăm tíu pêi cheăng pro hlá mơ-éa ki nếo vâ tơdah pêi tơdroăng cheăng ki mê. Ƀă mâu tơdroăng cheăng ‘na hồ sơ ki tơdjâk troh tơnêi, tơmeăm khoăng hyôh kong prâi têa ki hâi teăm ai hlá mơ-éa hnê mơhno pêi tiô túa ki nếo ƀă nôkố hâi chiâng pro kô tiâ ƀă hlá mơ-éa ăm kuăn pơlê, mâu khu tơrŭm cheăng, vâ kuăn pơlê ‘nâi vâ tối ăm mâu ki ê ‘nâi há ki xơpá dêi tơring  tung pơla nôkố”.

A pơlê kong krâm Buôn Hồ, tơdroăng tơkŭm rah pro rế lĕm nếo khu kăn kal thế pơlê kong krâm pêi nhên tơdrêng hên tơdroăng cheăng ki kân tung pơla iâ khế. Pôa Đặng Gia Duẩn, Kăn hnê ngăn Vi ƀan kuăn pơlê dêi pơlê kong krâm Buôn Hồ ăm ‘nâi, kăn hnê ngăn pơlê kong krâm hlối tô tuăn tơdroăng cheăng a cheăm ki nếo tíu tơná kô pêi cheăng, hlối hbrâ pêi cheăng a mâu cheăm bêng nôkố, hlối pro tơniăn mâu tơdroăng cheăng ki mơ’nui a râ tơring:

“Hdrối vâ pơtê mâu kăn râ tơring tô tuăn ki malối cho tơdroăng ‘na liăn ngân, tơdroăng rah mơngế pêi cheăng ăm tơnêi têa, lăm pêi cheăng ukố umê. Má péa, ngin dế pro hlâu khât vâ ăm mâu cheăm bêng ki nếo dêi pơlê kong krâm Buôn Hồ hdrối chôu vâ tơ’mot vâi kô ai mâu tơdroăng tơ’lêi hlâu má môi ‘na tơmeăm khoăng, ‘na kuăn mơngế ƀă malối cho ‘na tơdroăng kal pêi vâ mơnúa pêi cheăng ƀă kô pêi cheăng khât sap hâi lơ 1/7”.

Tiô pơkâ, hâi lơ 25 troh lơ 26/6, mâu tíu pêi cheăng pro hlá mơ-éa ki nếo a Dak Lak kô pơxiâm mơnúa pêi cheăng. Hâi lơ 30/6, kong pơlê kô tơkŭm po leh tơbleăng mơjâng kong pơlê Dak Lak ki nếo ƀă ai 102 tíu pêi cheăng râ cheăm, bêng. Tiô pôa Nguyễn Đình Trung, Ngế cheăng tung tíu xiâm Đảng, Kăn hnê ngăn Đảng kong pơlê Dak Lak, pơ’lêh nếo tuăn tơmiât ƀă mơdêk hnoăng cheăng pêi cho tơdroăng kal thế pêi tơdrêng pơkâ ƀă mâu kăn ƀô̆ kŏng chưk tung pơla nôkố :

“Pin hdrối nah ai tơdroăng cheăng pêi nhên thế pơ’lêh tơdrêng hlối vâ chiâng hmâ ƀă pơkâ ‘na tơdroăng cheăng. Kăn ƀô̆ Kŏng chưk cheăm ki nếo liên thông ƀă kong pơlê, liên thông ƀă Tíu xiâm tơnêi têa xua mê ki hlê plĕng hnoăng cheăng pêi gá thế phá. Pơkâ thế tơdroăng cheăng pêi kal kí ai pơkâ ƀă kăn ƀô̆ kŏng chưk, malối kăn ƀô̆ pơkuâ hnê xiâm dêi râ cheăm bêng ki nếo thế hmâ achê  ƀă kuăn pơlê, thế pêi cheăng krâu khât malối ƀă tơdroăng kuăn pơlê kal vâ”.