Kơxê lơ 13/7, pôa Phạm Minh Chính, Ngế pro xiâm hnê ngăn tơnêi têa rơtế ƀă khu kăn Kuô̆k hô̆i pơlê kong kân Cần Thơ hiăng trâm kuăn pơlê ‘na tơdroăng kăn ƀô̆, giảng viên, khu ki hriăn ‘na khoa hok ƀă kong ngê̆ kơvâ khoa hok kong ngê̆ a pơlê kong kân.

Akố, Ngế pro xiâm hnê ngăn tơnêi têa tối nhên ki pơxúa dêi Hneăng hôp rôh má 9 Kuô̆k hô̆i hneăng XV, tung mê, Kuô̆k hô̆i hiăng tơbleăng Pơkâ ‘mâi pơhlêh luât, pro rôh tơ’lêi ‘na luât ăm kăn pơkuâ pơlê kong kân péa râ.

Ngế pro xiâm hnê ngăn tơnêi têa tối nhên tơdroăng pêi túa pơkâ kố kô gum pro pơhlêh nếo túa tơmiât, pơhlêh sap ing kơdrâ chiâng rơnáu gum kuăn pơlê, po rơdâ tơdroăng mơnhông, pro ki kơnía ƀă ivá nếo. Pơtối mơnhông hiâm mơno pro ngế pơkuâ dêi kuăn pơlê, khu mơdró kâ ƀă hiâm mơno mơjiâng Tơnêi têa pơkuâ dêi kuăn pơlê, xua kuăn pơlê ƀă dêi kuăn pơlê, xua mê kuăn pơlê xuân athế veăng tung tơdroăng mơjiâng troăng hơlâ, vâ troăng hơlâ mê châ mot trâu hngế tung rêh ối, pro pơxúa rêh ối phâi hơtôu, hơniâp ro.