Kơxê lơ 24/9, a Tíu pêi cheăng Chin phuh, pôa Phạm Minh Chính, Ngế pro xiâm hnê ngăn Chin phuh pơkuâ roh hôp roh má 4 Khu hnê mơhno dêi Chin phuh ‘na mơnhông khoa hok kŏng ngê̆, pơhlêh nếo tơmiât pêi rơkê ƀă Tơdroăng tơkêa bro 06. Pêi pro Tơdroăng pơkâ 57 dêi Khu xiâm kal kí, troh nôkố Khoa hok kŏng ngê̆, pơhlêh nếo tơmiât pêi rơkê ƀă pơhlêh xúa kŏng ngê̆ ai troăng mơnhông ó rơdêi.

Khế 8 hơnăm kố, Việt Nam châ Top 10 lâp plâi tơnêi ‘na ki têi Internet; 1/4 pơ’leăng mâ mơngế châ ai hyôh 5G; phiu ro hiăng mơjiâng pro kêi đeăng Tíu xiâm ‘noăng chư chêh tơnêi têa tơnêi têa kơxô̆ 1; xúa mâu troăng cáp quang a tơnêi ‘lâng xŏn vâ chê 4.000km tơdjêp 5 kong têa.

Kơvâ kơmăi kơmok kŏng ngê̆ kơxô̆ pơtối mơnhên hnoăng ki xiâm drêng 8 khế hiăng hluâ pêi lo liăn châ lối 3,2 rơtuh rơtal liăn...A roh hôp, pôa Phạm Minh Chính, Ngế pro xiâm hnê ngăn tơnêi têa tối nhên, mâu pơkâ dêi Khu xiâm kal kí nếo po khu pơkuâ tơdjâk troh khoa hok kŏng ngê̆, pơhlêh nếo tơmiêt pêi rơkê, pơhlêh xúa kŏng ngê̆; xua mê thế hbrâ rêm hâi, rêm chô vâ djâ khoa hok kŏng ngê̆, pơhlêh nếo tơmiêt pêi rơkê ƀă pơhlêh xúa kŏng ngê̆ tung rêm tơdroăng pêi cheăng.

Ngế pro xiâm hnê ngăn tơnêi têa pơkâ thế thâ mơjiâng kêi đeăng ‘noăng chư chêh mâu kơvâ cheăng, mâu râ tung hơnăm kố. Ngế pro xiâm hnê ngăn tơnêi têa tối rơdêi hiâm mơno pêi pro rĕng, châ tơƀrê, hluâ pơkâ tâi tâng; thế xo kuăn pơlê, khu tê mơdró pro tíu xiâm, pơkuâ, ivá mơhnhôk, mơngế pêi cheăng dêi tơdroăng mơnhông mơdêk. ‘Na pêi pro khu râ kăn pơkuâ 2 râ, Ngế pro xiâm hnê ngăn tơnêi têa pơkâ thế tơkŭm kêi đeăng pơhlêh xúa kŏng ngê̆, ki rơhêng vâ tối râ cheăm.