Hâi lơ 24/9, Khu pơkuâ Đảng ŭy kong pơlê Gia Lai tơkŭm po Hneăng hôp tơpui tơno pơla Khu hnê mơhno má môi Tĭnh ủi ƀă hnê mơhno má môi Đảng ủi 135 cheăm, bêng vâ mơnhên tơdroăng châ tơƀrê dêi troăng pêi khu râ kăn pơkuâ 2 râ klêi kơ’nâi 3 khế pêi pro. Tiô tơbleăng a hneăng hôp, mâu kơ koan Đảng, khu râ kăn pơkuâ, Mât trâ̆n Tơnêi têa ƀă rêm râ a pơlê pơla pêi cheăng tơniăn lĕm, châ tơƀrê. Tíu xiâm pro mơ-éa tơnêi têa râ cheăm tơxâng tơtro tơdroăng kal vâ tŏng gum kuăn pơlê ƀă khu tê mơdró.

Lâp kong pơlê hiăng tơdah lối vâ chê 300.000 hô sơ, tung mê, lối 90% tơleăng tro ƀă hdrối hâi pơkâ. A roh hôp, hên rơkong tơpui pâ thế kong pơlê tơmâng xing xoăng kơxô̆ liăn mơjiâng nếo tíu pêi cheăng râ cheăm, bêng klêi kơ’nâi tơmot chiâng môi; tŏng gum kế tơmeăm kơmăi kơmok kŏng ngê̆ thông tin, tơ’nôm ƀiên chê̆ a mâu kơvâ tá hâi tŭm. Mâu cheăm xuân pâ thế mơ’no liăn pro hngêi trăng troăng klông, rơchôa hno têa, hngêi trung hriâm, hngêi pơkeăng cheăm, hngêi khôi túa lĕm tro.

Tiô pôa Hồ Quốc Dũng, Kăn pơkuâ hnê ngăn cheăng Đảng Tỉnh uỉ Gia Lai tối, mâu cheăm, bêng kal pơtối kêi đeăng tâi tâng khu pêi cheăng, tơ’nôm kăn ƀô̆, mơjiâng tơdroăng pêi inhên, kơtăng pêi pro mâu pơkâ mơnhông, tơdjêp ƀă tơdroăng kơdroh kơtiê, tơniăn tơdroăng rêh ối pơlê pơla. Pôa Hồ Quốc Dũng tối rơdêi, vâ mơdêk tâ mê nếo châ tơƀrê tơdroăng pêi cheăng, pơtối mơdêk xing xoăng râ, xing xoăng hnoăng ăm mâu cheăm.