Ƀă tơdroăng tối “Pơ-eăng ki kơnía hơniâp lĕm, pơ’lêh rơdêi kô mơnhông tung la ngiâ krá tơniăn”. Kăn xiâm hnê ngăn tơnêi têa tối, 80 hơnăm hdrối, khu lâp kong têa đi đo cho tơdroăng púi vâ tơdjuôm dêi kuăn mơngế, ‘na hơniâp lĕm, tơrŭm ƀă mơnhông, ngăn a mâu tơdroăng ki pơxúa ‘na kuăn mơngế, tơniăn krê hdroâng mơngế, ôh tá pơrah ƀă rế rơkê pơlê pơla.   

Kăn xiâm hnê ngăn tơnêi têa khĕn kơdeăn hnoăng cheăng pêi dêi khu tơrŭm tung kơpong, tung mê a ASEAN rak ki xiâm a châu Á –Thái Bình Dương, kơhnâ mơjiâng khu mâu kong têa mơ-eăm dêi, tá tŭm tơdroăng, krá kak. Kăn xiâm hnê ngăn tơnêi têa tối tơdroăng hơ’muăn ‘na Việt Nam ing tíu tơnêi pá xúa tơplâ, ing tơnêi têa kơtiê, ôh tá ai ki klâi, tro mơdât tá ăm cheăng kâ la hiăng kâi mơnhông tơná chiâng tơnêi têa dế xông rơdêi, kơxô̆ liăn pêi lo tâng riân rêm ngế vâ châ tơdâng, tơrŭm trâu rơdâ ƀă veăng pêi mâu tơdroăng kring vế hơniâp lĕm Khu lâp kong têa.