Pơchuât tơbleăng tơdroăng cheăng kal kí tối nhên, hneăng cheăng hdrối nah Đảng ủi ƀă mâu râ Đảng hiăng pêi pro kơtăng khât tơdroăng Pơkâ Hneăng hôp XIII, mâu tơdroăng pơkâ, mơgêi dêi Tơnêi têa ƀă hneăng hôp Đảng ƀô̆ rêm râ. Malối, sap ing hneăng má 4/2024, Khu xiâm pơkuâ tơdroăng kal kí, Khu pơkuâ ngăn Đảng xua pôa Tô Lâm - Kăn xiâm pơkuâ hnê ngăn cheăng Đảng pơkuâ hiăng teăm pơkuâ, hnê mơhno hên hnoăng cheăng ki kal, cho tơdroăng cheăng tung la ngiâ, tơƀrê, ai pơxúa sap nah hâi chói ai.

Tơpui hnê mơhno, Kăn xiâm pơkuâ hnê ngăn cheăng Đảng pơkâ thế Hneăng hôp tơkŭm tơpui, mơnhên tối tŭm mâu tơdroăng pơkâ thế, hnoăng cheăng tung hneăng ki nếo. Kăn xiâm pơkuâ hnê ngăn cheăng Đảng tối nhên, hneăng cheăng la ngiâ, khu tơrŭm cheăng Đảng ƀă đảng viên tung Đảng ƀô̆ mâu kơ koan Đảng Tơnêi têa athế djâ troăng ahdrối, kơdo mơ-eăm, djâ troăng ahdrối tung mâu kơvâ cheăng, rak vế tơdroăng pơkuâ dêi Đảng a tâi tâng mâu kơvâ cheăng rêh ối pơlê pơla, veăng gum pêi pro pơhlêh pơkâ pêi mơnhông tơnêi têa rĕng, krá tơniăn.