Kơxê lơ 24/9 a Hà Nội, pôa Tô Lâm, Kăn xiâm pơkuâ hnê ngăn Đảng, Kăn pơkuâ hnê ngăn Đảng Kơvâ lêng Tơnêi têa hiăng troh veăng ƀă xông tơpui a Hneăng hôp Tơ’noăng khŏm ƀlêi trâng tâi tâng khu lêng roh má XI hneăng hơnăm 2020 – 2025. Pôa Tô Lâm, Kăn xiâm pơkuâ hnê ngăn Đảng rơkâu mâu tơdroăng châ tơƀrê ki má môi dêi mâu tíu cheăng, ngế krê ƀă khu pú hên hiăng châ tung tơdroăng tơ’noăng khŏm ƀlêi trâng tung pơla kố nah; tơdrêng amê, tối tơdroăng ki troh lâp lu dêi tơdroăng tơ’noăng khŏm ƀlêi trâng ôh tá xê to pơtê a khu tê mơdró, tíu pêi cheăng tung khu lêng mê ối pơtroh tơdroăng ki pro hâk vâ ăm mâu khu xiâm, kơvâ cheăng, kong pơlê, khu tê mơdró ƀă pơlê pơla, veăng kum pro tơdroăng thế rak vế tung rêh ối, cheăng kâ tơ’noăng pâ nhuô̆m tơnêi têa lâp lu dêi tơnêi têa tung mơjiâng ƀă gâk kring Tơnêi têa.

Vâ pơtối mơnhông mâu tơdroăng châ tơƀrê hiăng châ, Kăn xiâm pơkuâ hnê ngăn Đảng tối nhên tơdroăng lâp plâi tơnêi, kơpong tung la ngiâ pơtối ai tơdroăng ôh tá tơniăn, tơplâ kŏng ngê̆ rơxông nếo tâk; xua mê pơkâ mơjiâng ƀă gâk kring Tơnêi têa tung rơxông nếo pơkâ thế khu lêng pin rế chính quy, ƀeăn ƀĕng rơkê, tiô rơxông nếo, rế troh lâp lu ƀeăn rơkê xúa kŏng ngê̆.

Tung pơla mê tơ’noăng khŏm ƀlêi trâng thế mơhno chiâng: Khu lêng tơplâ xo túa pơkâ hnê pơtâp păng ‘nâng, tro mơngế, tro kong pơlê, tro ‘na pháu hnêa, ngăn tơdroăng ki pơkuâ pháu hnêa kŏng ngê̆ rơxông nếo cho kơlo têk chu ki pơklât, ngăn kih luât, rak tơniăn cho troăng tơkăng khêi. Roh kố, khu râ kăn pơkuâ Khu xiâm pơkuâ lêng hiăng diâp Hlá cơ tơ’noăng ăm 84 khu pú hên; diâp ƀâng kheăn kơdeăn ăm mâu khu pú hên ƀă ngế krê xua ai hên tơdroăng châ tơƀrê tung tơdroăng tơ’noăng khŏm ƀlêi trâng tâi tâng kuăn pơlê roh má 11.