Kơxê lơ 24/9, a bêng Buôn Ma Thuột, Khu ngăn Ôm hyô Hà Nội tơrŭm ƀă Khu ngăn Túa lĕm tro, Tơ’noăng ivá ƀă Ôm hyô mâu kong pơlê Dak Lak, Gia Lai, Khánh Hòa, Lâm Đồng ƀă Quảng Ngãi tơkŭm po Rôh hôp pơkâ mơdêk tơbleăng ƀă tơrŭm mơjiâng pro ôm hyô.

Rôh hôp kố cho vâ thăm mơnhông tơrŭm, mơnhông ki ai hlâu dêi 6 to kong pơlê, tơmiât troh mơjiâng túa kế tơmeăm pơla mâu kong pơlê, pơla kơpong hên, lĕm, ro, tơkŭm a pŭn khu: túa lĕm tro-cho túa ki lĕm; kong kế - châ lăm mơnúa ngăn; kế kâ - roê xúa kế tơmeăm; ôm hyô tơkŭm ƀă rôh hôp ƀă tơ’noăng ivá. Klêi kơ’nâi tơbleăng kế tơmeăm ki ai hlâu, tối ‘na ki rơkê plĕng mơjiâng pro ôm hyô tro ƀă túa lĕm tro, pêi chiâk deăng; pơkâ mơ’no mơjiâng pro kế tơmeăm kơxô̆ tung pơkuâ rak ngăn ƀă mơđah tơbleăng vâ rĕng tơdjêp, tơdrăng pơla khu mơdró kâ ƀă tơmối. Kô cho hvêa prôk ki kal, veăng gum pêi pro pơhlêh tơdroăng cheăng tung la ngiâ tơrŭm, mơnhông ôm hyô krá ton tung la ngiâ.