Jâ Rơ Chăm H’Phit, Kăn pơkuâ hnê ngăn Đảng uỷ cheăm Ia Khươl tối ăm ‘nâi, kuăn pơlê akố pói rơhêng vâ Gia Lai kô pơtối mơnhông ó rơdêi tâ nếo. Nôkố kong pơlê hiăng ai têa kơxĭ mê mâu ivá, tơmeăm khoăng dêi kơpong kong ngo kô pơtối châ mơdêk:

“Klêi kơ’nâi tơ’mot péa to kong pơlê, tơdroăng ki tơrŭm cheăng pơla kong ngo ƀă tơnêi tíu ki pêi chiâk pêi deăng ga kô kân rơdâ, tơdjêp tá kong tơbăng ai têa kơxĭ, mê kong pơlê Gia Lai kô ai tơdroăng ki tơrŭm krá tơniăn ‘na logistic tung pêi chiâk pêi deăng, mơ’no tê kế tơmeăm pêi lo ing chiâk deăng, tơdroăng pêi lo kế tơmeăm khoăng, ká xixŏng ing têa kơxĭ ƀă hên mâu tơmeăm khoăng ki ê. Á tơmiât tiah kố, tơdroăng tơrŭm cheăng kố kô po troăng nếo ăm Gia Lai môi tơdroăng ki mơnhông mơdêk ki nếo”.

Pôa Nguyễn Danh, môi ngế ki hiăng pêi cheăng a Gia Lai ai 40 hơnăm, vêh mơnhên ngăn tơdroăng ki tơrŭm tơ’mot Gia Lai ƀă Bình Định kô thăm rĕng tah lôi mâu tơdroăng ki tơvâ tơvân, kreăng pá ăm tơdroăng mơnhông. Mâu tơmeăm ki vâ gum ăm tơdroăng ki mơnhông vêh mơjiâng kế tơmeăm, cheăng ki vêh mơjiâng tơmeăm a kong ngo Gia Lai, kô lăm mơdró kâ ing kơno tuk dêi kong pơlê tơkâ luâ troăng kân ki châ mơjiâng pro. Mâu tơmeăm khoăng rơtế tơ’lêi ing kong tơbăng troh a kong ngo. Pôa Nguyễn Danh ai tối tiah kố:

“Drêng tơrŭm tơ’mot pơla Gia Lai ƀă Bình Định chiâng kong pơlê Gia Lai kô gum kế tơmeăm, kế ki uâ mơjiâng vâ chiâng tơmeăm ki ê ki chiâng vâ mơ’no tê kế tơmeăm troh a kơno têa koxĭ, tơkâ luâ péa to tơraih tơƀai lơ tơkâ luâ bo cheăng tơrŭm tê mơdró ƀă mâu kong tea tung kơpong Đông Dương, mơjiâng chiâng tơdroăng ki tơ’lêi hlâu tung cheăng kâ, ‘na uâ mơdiê, mơ’no tê kế tơmeăm ƀă hnối mơnhông tơdroăngcheăng ki tơdjâk dêi logistics dêi kong pơlê ki nếo, kơnôm tơngah ing mâu troăng prôk ing pêa Kơnhŏng troh a Pêa Hdroh Tơnêi têa, tơkâ luâ troăng kân kơxô̆ 1 ƀă troăng ing Pêa Mâ hâi Lo troh Mâ hâi Lu, troăng kân kơxô̆ 19 kong pơlê”.

Tiô tơdroăng ki riân ngăn, kong pơlê Gia Lai ki nếo ai tơnêi tíu lối 21.000km2, pơ’leăng mâ mơngế ai vâ chê 3 rơtuh 600 rơpâu ngế, ối tung khu kong pơlê ki ai tơnêi tíu kân rơdâ ƀă pơ’leăng mâ mơngế ki kơdrâm hên tung tơnêi têa. Pôa Phạm Anh Tuấn, Kăn hnê ngăn Vi ƀan kong pơlê tối nhên, vâ pơtối châ mơnhông ivá cheăng kố, tơdroăng ki ai hlâu dêi kong-têa kơxĭ, mê kong pơlê kô tơkŭm pêi pro 3 hnoăng cheăng ki kal, mê cho: pơhlêh ing tuăn tơmiât tơdroăng pơkuâ ngăn chiâng hnoăng cheăng ki tŏng gum kuăn pơlê, ing tơdroăng chêh bro to hlá mơ-éa chiâng tơdroăng ki mơjiâng, ƀă xo kuăn pơlê-khu mơdró kâ pro tíu xiâm ki vâ pơkâ pêi hnoăng cheăng xiâm:

“Kong pơlê Gia Lai nếo cho tơdjêp, tơ’mot pơla péa kơpong tơnêi ki hiăng ai sap ing chal vâi krâ roh nah, ai hnoăng cheăng kâ dêi kăch măng ki ó rơdêi, ai hên khôi túa, vêa vong ki kro. Ki rơhêng vâ tối cho hiâm mơno tơrŭm bă tơdroăng pói rơhêng vâ châ mơnhông mơdêk ó rơdêi rơtế dêi pó tơdjuôm ivá vâ pơkâ pêi pro tơdrêng, châ pơxúa, xua ing tơdroăng ki mơnhông la ngiâ kâi tơxông, ó rơdêi, ăm i tơxâng ƀă tơdroăng rơkê, kro mơdrŏng ‘na tơmeăm khoăng kong kế”.

Pôa Hồ Quốc Dũng-Kăn pơkuâ hnê ngăn Đảng kong pơlê Gia Lai tối ăm ngin ‘nâi, kong pơlê kơdo mơ-eăm rak vế, pêi pro tơdroăng cheăng xiâm khŏm pêi lo châ 8% tung hơnăm kố, vâ ing mê, pơla hneăng hơnăm 2026-2031 kố châ pêi lo kế tơmeăm tâk châ 2 to kơxô̆:

“Kêi kơ’nâi ‘mot péa kong pơlê kố mê tơdroăng cheăng kâ dêi kong pơlê Gia Lai ki nếo ai dâng lối 250 rơpâu rơtal liăn, ai tá tơnêi tíu, kong kế, ngo ngối kân rơdâ, 134km tơnêi cho kĭng têa kơxĭ, môi kơpong tơbăng ki kro mơdrŏng, ai 2 tơraih tơƀai, kơno tuk, ai troăng rơxế lơtreng, troăng prôk ƀă hên hĕng mâu tơmeăm ki ê. Tung mê, ai tŭm mâu tơmeăm ki a tơnêi, a têa kơxĭ, tơdroăng ki u ối pro tiah lâi vâ pơtối mơnhông ivá k ó rơdêi vâ mơnhông kong pơlê Gia Lai chiâng môi tíu ki ó rơdêi dêi kơpong”.

Ing mâu kế tơmeăm ki môi tiah ‘na troăng prôk, tơraih tơƀai, kơno têa kơxĭ, troăng rơxế lơtreng, troăng kân ô tô ta troh a kơpong tơnêi-cheăng kâ: têa kơxĭ, kong tơbăng, kong ngo, mê kong pơlê Gia Lai ki nếo mơni kô chiâng tíu ki djâ troăng ahdrối dêi kơpong Tơdế tơnêi têa-Tây Nguyên tung mâu hơnăm la ngiâ.