Hlá mơ-éa chêh Luât Pêi cheăng séa ngăn dêi Kuô̆k hô̆i ƀă Hô̆i đong kuăn pơlê ‘mâi hơ’lêh hiăng ‘mâi hơ’lêh tâi tâng, pơkâ nhên tâ hnoăng, tơdroăng cheăng pêi dêi tơrêm ngế ki séa ngăn. Ing mê, luât 'mâi hơ’lêh pơkâ ‘na séa ngăn chuyên đề dêi Kuô̆k hô̆i, Hô̆i đong hnê ngăn Kuăn pơlê tiô troăng: Kuô̆k hô̆i, Hô̆i đong hnê ngăn kuăn pơlê ôh tá tơkŭm po tơdrêng ăm mâu Khu cheăng lăm séa ngăn mâu tơdroăng kal.

Tơbleăng a rôh hôp, Kăn xiâm hnê ngăn Kuô̆k hô̆i – pôa Trần Thanh Mẫn tối, pơkâ séa ngăn cho chêh mơjiâng klêi luât, rak tơniăn hnê khĕn tâng pro ôh tá tro, pêi tro luât ƀă mơdêk pêi tơƀrê tung pêi cheăng dêi mâu kăn Tơnêi têa. Pakĭng mê, tối nhên kal  pơkâ mơhno nhên hnoăng cheăng séa ngăn dêi Kuô̆k hô̆i ƀă Hô̆i đong kuăn pơlê, xuân môi tiah pơla mâu râ kăn dêi kong pơlê cheăm, vâ ví pôi tá tơvâ tơvân hên tơdroăng ƀă thế pêi tơniăn hlối tơƀrê.