A hneăng hôp rôh má 7, Hô̆i đong hnê ngăn kong pơlê Lâm Đồng hneăng X tơpui tơno, pơkâ ƀă 32 mơéa pơchuât tơbleăng ƀă 21 kơxop mơéa pơkâ, tung mê hên tơdroăng pơkâ cho tơdroăng cheăng tung la ngiâ, ton hơnăm, môi tiah: Pơkâ ‘na liăn ngân 5 hơnăm 2026 – 2030; Pơkâ ‘na hnoăng cheăng mơnhông cheăng kâ rêh ối pơlê pơla 5 hơnăm 2026 – 2030; Pơkâ mơnhông cheăng kâ rêh ối pơlê pơla hơnăm 2026 ƀă hên ki ê. Rơtế amê cho hên tơdroăng pơkâ ki ai tơdjâk troh tơdroăng ki rak vế krâu tŏng gum rêh ối pơlê pơla ƀă tơdroăng rêh ối dêi kuăn pơlê.

Tơkâ luâ hên xơpá, pơloăng mơnúa hơnăm 2025 cheăng kâ kong pơlê Lâm Đồng pơtối rak vế ki mơnhông chía hên ƀă 16/19 tơdroăng pơkâ pêi klêi ƀă tơkâ luâ túa pơkâ mơ’no; tâi tâng kơxô̆ liăn nâp ăm Tơnêi têa a kong pơlê tiô riân châ lối 31.200 rơtal liăn tâk 17% tâng vâ pơchông ƀă tơdroăng Tơnêi têa pơcháu. Pêi chiâk deăng pơtối tối rơdêi hnoăng cheăng tŏng gum cheăng kâ dêi kong pơlê; mâu kơvâ cheăng on tơhrik vêh pro, kơmăi kơmok bô xit alumin pơtối cho kơvâ cheăng ki kal tung mơnhông tơdjuôm dêi kong pơlê. Pôa Tiêu Hồng Phúc, phŏ kăn hnê ngăn Hô̆i đong kong pơlê Lâm Đồng, ăm ‘nâi, kong pơlê dế pơtối lêi tah mâu tơdroăng xơpá vâ pêi pro troh tơdroăng mơnhông tung cheăng kâ rêh ối pơlê pơla:

“Klêi kơ’nâi ‘mot tơkŭm kơ koan pêi cheăng tơnêi têa kăn pơkuâ 2 râ tung pêi cheăng apoăng hiăng pêi châ tơƀrê hên tơdroăng ki kal. Laga xuân ối ai hên tơdroăng ki ối tơvâ tơvân kal athế pơtối châ tơpui tơno ƀă pơkâ mơ’no mâu troăng hơlâ vâ lêi tah. Xua mê tung hneăng hôp tiah hmâ rôh kố mê khu pơkuâ ngăn Hô̆i đong hnê ngăn kong pơlê ôh tá tơkŭm po rôh hôp tiâ mơnhên”.

A hneăng hôp dêi Vi ƀan hnê ngăn kong pơlê Gia Lai, kăn cheăm Tuy Phương Bắc tối tung rôh kong mê khía mơhot têa kân lân lu pơla kố nah, Gia Lai ai 5 ngế hlâ, 11 ngế tro rong, lối 32 rơpâu toăng hngêi tro tơhnâp, têa mơhiu. Pôa pâ thế kơvâ pêi chiâk deăng ƀă hyôh kong prâi pêi pro ai há lơ ôh tơdroăng ki mơ’no têa sap ing mâu long rơchoâ têa mê chiâng pro têa lân lu, mơnhên tối ivá ki kâi trâng dêi kơmăi mơ’no têa nôkố, hnoăng cheăng pơkuâ ngăn ƀă troăng hơlâ hbrâ ví ƀă kong mê khía mơhot ton xŏn ƀă hên ki ê.

Tiâ rơkong kơ-êng, pôa Cao Thanh Thương – Kăn pơkuâ Khu ngăn chiâk deăng ƀă Hyôh kong pơlê Gia Lai – tối rơdêi ôh ti ai tơdroăng ki mơ’no têa a kroăng Hà Thanh. Kơpong kroăng ki kố ôh ti ai long têa. Péa to long têa ki kân a peăng mâ hâi Lo dêi kong pơlê cho Núi Một ƀă Định Bình tung rôh kong mê têa lân lu pơla hdrối kố nah pơrá têa tá hâi pêng, ƀă tơdroăng ki mơ’no têa long bu tơdjâk troh a kroăng Côn. Pôa Cao Thanh Thương xuân mơhno ki ôh tá tơniăn tung tơdroăng ki ki têa châ lo môi tiah tơdroăng ki pro hdi xo kĭng kroăng, pêt loăng keo tung kơpong ki mơ’no têa pro chiâng kŭn tíu ki têa hiu; môi tíu ‘noăng têa Hà Thanh hiăng tơ’nhiê lối chât kim xua têa hên luâ râ ƀă pro xôi kĭng rơchoâ long. ‘Na troăng tơmiât pêi ki ton xŏn, mâu kong pơlê kal athế séa ngăn túa pơkâ ‘mâi xê̆n kuăn pơlê tiô rêm rôh ki rơ-iêo dêi kong mê khía mơhot. Pôa Cao Thanh Thương ăm ‘nâi, nôkố kơvâ pêi chiâk deăng hiăng mơ’no pái troăng hơlâ.

“Vâ rak tơniăn ôh tá ăm têa châ lo, khu ngăn chiâk deăng hiăng tí tăng ‘nâi plĕng ăm Vi ƀan hnê ngăn kong pơlê ai túa pơkâ ‘na kơpong têa châ lo ing kroăng Hà Thanh, laga ‘no liăn pêi cheăng hên, kal ai hâi khế. Ki hdrối tâ, khu hiăng tí tăng ‘nâi plĕng ăm Vi ƀan hnê ngăn kong pơlê tơdroăng ki kui tah trâp tơnêi pro ăm gá phuâng lĕm mâu long rơchoâ, hno têa vâ ăm têa châ lo. Má péa cho athế ‘noăng athế châ rak ngăn mâu kơpong kuăn pơlê ối. Má pái cho athế séa ngăn, pơxâu phâk tơdroăng ki hdi xo tíu ki mơ’no têa. Kố cho 3 tơdroăng ki xiâm kal athế pêi tơdrêng hlối”.

A hneăng hôp mơ’nui hơnăm, Hô̆i đong hnê ngăn kong pơlê Quảng Ngãi mơnhên tối, kong pơlê hiăng pêi klêi 24/24 tơdroăng pơkâ pêi hơnăm 2025, tơdrêng amê hlối pêi pro nhên pái tơdroăng ki ối tơvâ tơvân kân kal châ lêi tah vâ pro tơdroăng ki mơnhông tung hơnăm 2026 – 2030. Mê cho, túa pơkâ thăm mơnhông tá hâi krá tơniăn drêng nâp liăn tơkôm tung mâu kơxô̆ liăn ki ê; tê tơmeăm ngi kong têa ê kơdroh; pêi chiâk deăng tơrŭm ‘ro; ôm hyô tá hâi tơxâng ƀă ki ai hlâu. Troăng klông ki xiâm môi tiah troăng prôk, logistics, kơno têa kơxĭ ƀă mâu troăng prôk tơdjêp tung kơpong tá hâi tơdâng tơ’mô; tơdroăng ki xo tơnêi, ‘no liăn pêi cheăng tơdjuôm ối hrá; hên tơmeăm túa lĕm tro-hnê hriâm-khăm pơlât hiăng tơ’nhiê.

Mot tung hneăng mơnhông nếo, kong pơlê Quảng Ngãi mơ’no thế pơhlêh rodêi tâ. Pôa Nguyễn Hoàng Giang, Kăn hnê ngăn Vi ƀan kong pơlê Quảng Ngãi tơpui:

“Ƀă tơdroăng ki rơkê plĕng cho pêi pro rĕng tâ-rơdêi tâ-kơtăng tâ; tơleăng mâu tơdroăng cheăng troh tui lui; tối athế pêi, Vi ƀan hnê ngăn kong pơlê Quảng Ngãi kô tơkŭm mâu kơxô̆ liăn, mơnhông ki ai hlâu, ki pơxúa, mâu tơdroăng ki hiăng pêi klêi, rơtế ƀă tơdroăng ki ‘mâi mơnhông ki u ối, ối ‘ro, pro tơ’lêi hlâu mâu tơdroăng ki xơpá, mơeăm pêi klêi tơdroăng mơnhông cheăng kâ rêh ối pơlê pơla hơnăm 2026, pro chiâng ivá krá rơdêi ăm hơnăm 2026 – 2030.