Tung rôh lăm pôu râ kăn xiâm tơnêi têa troh Hàn Quốc, kơxê hâi lơ 12/8, a pơlê kong xoâm Seoul, pôa  Tô Lâm - Kăn xiâm pơkuâ hnê ngăn Đảng hiăng hôp ƀă pôa Woo Won Sik - Kăn xiâm hnê ngăn Kuô̆k hô̆i Hàn Quốc. A rôh tơpui tơno, pôa Tô Lâm - Kăn xiâm pơkuâ hnê ngăn Đảng loi khât Hàn Quốc kô pơtối mơnhông rơdêi, pêi tơƀrê hên tơdroăng ki kân tâ, rế mơdêk ki rơdêi a kơpong ƀă lâp plâi  tơnêi, tung mê, ai Kuô̆k hô̆i Hàn Quốc pơtối rak vế hnoăng cheăng ki kal dêi kơ koan mơjiâng luât.

Pôa Tô Lâm pơkâ thế péa pâ tơrŭm krá, ai pơxúa mâu luât tơrŭm cheăng péa pâ ƀă hên troăng mê cho pơtối lôu péa hên tâ nếo ăm tơmeăm dêi Việt Nam châ tê hên a kong têa Hàn Quốc. Péa pâ xuân hiăng tơpui tơno ‘na mâu tơdroăng tung kơpong ƀă lâp plâi tơêi ki péa pâ rơtế vâ ‘nâi plĕng hlối môi tuăn ƀă dêi rơpó mâu luât pơkâ, hneăng hôp hên tơdroăng, tung mê, ai Tơrŭm mâu kăn Kuô̆k hô̆i ƀă lâp plâi tơnêi (IPU), Khu tơrŭm cheăng Kuô̆k hô̆i mâu kong têa Châu Á xua vâ hơniâp lĕm (AAPP); vâ môi tuăn mơdêk tơrŭm cheăng pơla mâu đảng a kơpong châu Á.