Veăng hôp ối ai lối  500 ngế mâu kăn  lo ing mâu khu mơdró má môi péa tơnêi têa. Hneăng hôp ôh tá xê to tíu tơdjêp ki kal mâu kuăn pơlê khu mơdró mê ối pro xiâm ki kal tung tơdroăng mơdêk tơrŭm cheăng kâ, tê mơdró ƀă ‘no liăn cheăng péa pâ. Tơbleăng a hneăng hôp.

Pôa Tô Lâm tối tơdroăng cheăng kâ - rêh ối Việt Nam hơnăm 2024 ƀă 6 khế apoăng hơnăm 2025 châ tơbrê hên; tối nhên hơnăm 2025 ôh tá xê cho hơnăm “pêi rĕng, tơƀrê” vâ pê klêi mâu pơkâ mơnhông tơƀrê dêi pơla hơnăm 2021-2025, mê ối pro xiâm ki pá kĭng, pro xiâm ki kal ƀă mơhnhôk pêi rơdêi vâ pê klêi 2 tơdroăng pơkâ 100 hơnăm, mơnhông tơnêi têa mot tung chal nếo - chal ki mơnhông tơná, mơnhông kro mơdrŏng, rơkê,  hơniâp dêi hdroâng mơngế.

‘Na tơrŭm cheăng, tơ’mot khu ‘no liăn cheăng ing kong têa ê, Việt Nam pơ’lêh ing tuăn tơmiât  “tơ’mot tiô ki rơdâ’’ troh “tơ’mot tiô ki rế hên trâu ‘’ai rah xo, pêi ahdrối mâu tơdroăng tơkêa bro ai pêi cheăng ƀă kơmăi ki nếo, kơmăi ki dâi lĕm, kŏng ngê̆ lĕm krúa, rak ngăn tiô túa nếo, ai pơxúa hên, ai tơbleăng troh lâp lu, tơdjêp ƀă tơdroăng pêi pro ƀă tê tung lâp plâi tơnêi.