Cheăm Lạc Dương, kong pơlê Lâm Đồng châ mơjiâng ing tơ’mot 3 to cheăm: Dà Sar, Dà Nhim ƀă Dà Chais dêi tơring Lạc Dương ki ton. Kố cho cheăm ai tơnêi kân rơdâ má môi dêi kong pơlê, vâ chê 830km2, pơ’leăng mâ mơngế vâ chê 15.000 ngế, tâi tâng to hdroâng mơngế K’Ho. Cheăm ai 30 chi ƀô̆ ƀă lối 500 ngế đảng viên. Pôa Ya Tiong, kăn hnê ngăn cheăm Lạc Dương, ăm ‘nâi, tung plâ hbrâ ƀă ăm mâu kăn pêi cheăng sap hâi lơ 1/7, cheăm tơmâng ngăn khât troh tơdroăng pơtối rak túa lĕm tro ton nah tơrŭm dêi rơpó tung kăn ƀô̆ ƀă kuăn pơlê.

“Ki hdrối cho tung mâu kăn dêi kơ koan môi tuăn ‘nôi, tơrŭm dêi rơpó ki mê cho ki kal vâ pơkuâ hnê djâ pêi tơdroăng cheăng. Tung hâi lơ 2/7 cho hâi mơjiâng mâu kơ koan ki tơdjâk troh hnoăng pơkuâ dêi râ cheăm. Kuăn pơlê a kố hdroâng kuăn ngo xiâm ki ối akố ai 86% , tơnêi rơdâ, kuăn pơlê ối preăng prêh, ngin hbrâ ‘no liăn ing apoăng kuăn pơlê a kố tơrŭm dêi rơpó, vâ môi tuăn”.

Klêi tơ’mot 3 kong pơlê Lâm Đồng, Dak Nông ƀă Bình Thuận, kong pơlê Lâm Đồng nếo ai  tŭm mâu tơdroăng ki vâ hên kơvâ cheăng kô mơnhông tơƀrê, châ ối ahdrối, mê cho kơvâ ôm hyô ngăn kong- têa kơxĭ Đà Lạt- Phan Thiết; rak bauxite ki hên má môi lâp tơnêi têa ai dâng 5,4 rơtal tâ̆n eâk meăm rơbu ki hâi chiâ xo; mâu xiâm têa châu ối hên;  têa kơxĭ xŏn 192km...

Vâ rĕng châ rak, pơkuâ ngăn, xúa hên ki ai hlâu, tơmeăm khoăng tung môi kơpong tơnêi rơdâ ing kong ngo troh a têa kơxĭ, kong pơlê Lâm Đồng ‘nâi nhên khu kăn xiâm 2 râ thế pêi cheăng rêm hâi, ôh tá pơtê, pêi tơƀrê, ai pơxúa. Pôa Nguyễn Hồng Hải, Phŏ Kăn hnê ngăn Vi ƀan kuăn pơlê kong pơlê Lâm Đồng, ăm ‘nâi, tơdroăng kố kô pêi tơbrê tâng môi tuăn hlối tơrŭm krá ƀă dêi rơpó:

“Pin dế pơtó pêi tơdroăng cheăng mê ôh tá ‘nâi tŭm tâi. Tơdroăng ki apoăng tơrŭm dêi rơpó vâ rơtế pê klêi tơdroăng cheăng dêi kong pơlê ki nếo. Tâng pin ôh tá tơrŭm mê ôh tá chiâng pro ki klâi. Pin thế tơdjuôm dêi rơpó pêi tơdrêng hlối thế tơkŭm tơbleăng”.

Tung hên tơdroăng cheăng pêi dêi môi kong pơlê ki nếo châ mơjiâng ing tơ’mot 3 to kong pơlê, hơnăm kố kong pơlê Lâm Đồng ki nếo xuân mơ-eăm pêi châ tiô pơkâ tâk cheăng kâ lối 8% ƀă tâk 2 kơxô̆  tơngi klêng tung mâu khế la ngiâ. Vâ ai tiah mê, kăn ƀô̆ ƀă kuăn pơlê tung kong pơlê Lâm Đồng dế têk a ‘ngêi hlá cờ Tơrŭm dêi rơpó môi tiah rơkong Pôa Hồ hnê vâ ai ivá rơdêi tơkŭm ƀă dêi rơpó, mơjiâng kong pơlê Lâm Đồng xông rơdêi rĕng ƀă krá tơniăn ton.