Tối mơgêi a rôh hôp, pôa Tô Lâm - Kăn xiâm pơkuâ hnê ngăn Đảng khĕn kơdeăn khât tơdroăng ki mơ-eăm dêi Đảng ủy Chin phuh, Đảng ủy Khu xiâm ngăn ‘na luât, Đảng ủy Khu xiâm ngăn ’na liăn, Đảng ủy Khu xiâm cheăng Khoa hok ƀă Kŏng ngê̆ ƀă Đảng ủy mâu khu xiâm kơvâ cheăng tung pơla iâ hâi hiăng pêi klêi hên tơdroăng cheăng ki kân, ki pá tâ ƀă pơkâ pêi tơdroăng tah xơpá, tơvâ tơvân xua pơkâ dêi Luât.  

Rôh apoăng mâu tíu ki pá hiăng châ tah, ôh tá pơtối pro pá tung mơnhông ƀă po troăng ki xiâm vâ pêi. Tung la ngiâ, pơkâ thế, Đảng ủy Kuô̆k hô̆i, Đảng ủy Chin phuh hnê mơhno tơ’nôm mâu tơdroăng Tơkêa luât ki kal a tơdroăng dêi luât hơnăm 2025 dêi Kuô̆k hô̆i, tơbleăng a rôh hôp má 10 dêi Kuô̆k hô̆i hneăng 15 vâ rĕng pêi klêi mâu tơdroăng tah ki pá  tơvâ tơvân tơdjâk troh luât; Đảng ủy Chin phuh hnê mơhno pơtối pê klêi tơdroăng séa ngăn, tơniăn tro tiô troăng hơlâ ki xơpá, tơvâ tơvân tối ki hiăng tơmâng  châ  xo tung pơla hdrối kố nah.