Hâi lơ 5/8, Vi ƀan kong pơlê Gia Lai hiăng ai tơbleăng pơtroh Khu hnê mơhno mâu tơmeăm ki xiâm tơnêi têa dêi kong pơlê, tơ’nôm tơdroăng hbrâ pêi pro Tơdroăng tơkêa bro mơ’no liăn mơjiâng troăng kân ăm phêp rơxế kơtâu têi Quy Nhơn – Pleiku. Tiô tơbleăng kố, Kong pơlê Gia Lai hiăng hbrâ vâ pro tơdroăng tơkêa bro tung khế 10 hơnăm kố.

Ƀă tơdroăng tơkêa bro Troăng kân ăm phêp rơxế kơtâu têi Quy Nhơn – Pleiku, kong pơlê hnê mơhno mâu tíu pêi cheăng pêi pro séa ngăn tơnêi tơníu, troăng pêi tơmiât kum mơjiâng pro; pâ thế pơhlêh tâi tâng troăng kân kơpong tơkâ hluâ văng An Khê vâ kơdroh kơtâu têi, kơdroh chôu mơjiâng pro ƀă kơdĭng kơxô̆ liăn. Tơdroăng tơkêa bro troăng kân ăm phêp rơxế kơtâu têi Quy Nhơn – Pleiku xŏn dâng 125 km, troh a kong pơlê Gia Lai, troăng kân ai 4 hơlâ troăng rơxế, chiâng kơtâu têi 100km/h; mâu tơmeăm troăng tung kơdâm tơnêi, kông, mâu hơlâ troăng kân, tơmeăm ki rơkê ƀă tíu tot pơtê.

Tâi tâng kơlo liăn mơ’no tâi tâng tơdroăng tơkêa bro dâng 43.734 rơtal liăn, tung mê, kong pơlê Gia Lai tơkêa xing xoăng 1.250 liăn ing liăn ngân kong pơlê ƀă liăn ngân tro luât ki ê ăm tơdroăng tăng tơnêi pro troăng kân.