Cheăng kâ rêh ối pơlê pơla kong pơlê Dak Lak pơtối hlo ki tơƀrê. Kong pơlê Dak Lak dế tơkŭm pêi tơdroăng tơkâ luâ ki pá tơvâ tơvân tung tơdroăng cheăng dêi mâu kăn kong pơlê péa râ, mơdêk pêi tơƀrê hnê mơhno pơkuâ, pêi ai tiô pơkâ tâk 8% tung hơnăm 2025.

Vi ƀan kuăn pơlê dêi kong pơlê Dak Lak ăm ‘nâi, pakĭng tơdroăng pêi châ tơƀrê dêi kơvâ cheăng ƀă kơmăi kơmok, mơjiâng, pêi chiâk deăng, pêt kong, păn ká ƀă tê ăm kong têa ê, mê kơvâ păn mơnăn dêi kong pơlê xuân tăng nếo ki tơngah klêi ai pơreăng tâ tú hiăng mơdât. Malối, tơdroăng tah hngêi pơtân, hngêi xi kơchoh ăm mâu ngế kơtiê châ tơbleăng pêi kơtăng khât. troh nôkố, 100% toăng hngêi kơjo kum hiăng pơxiâm pro, lối 6.900 toăng hngêi pơcháu ăm, châ vâ chê 78% tơdroăng pro, mơ-eăm pro klêi a hâi lơ 15/8.

Tiô pôa Tạ Anh Tuấn, Kăn xiâm hnê ngăn Vi ƀan kuăn pơlê kong pơlê Dak Lak, mơhé ti mê, vâ ai tiô pơkâ tâk tâi tâng tơmeăm tung kong pơlê plâ hơnăm 8%, tâk 8,64% tung 6 khế mơ’nui hơnăm, xuân cho tơdroăng cheăng pêi ki pá. Vâ ai tiô pơkâ mê, ki hdrối thế tah xơpá tơvâ tơvân tung pêi cheăng dêi mâu kăn kong pơlê péa râ; tơkâ luâ tơdroăng pá, ki mơdon a mâu tơdroăng tơkêa bro ki kal, ƀă mơdêk xo liăn ngân ‘no mơjiâng pro tơmeăm khoăng tơnêi têa.