A rôh hôp, Kăn xiâm hnê ngăn Kuô̆k hô̆i ăm ‘nâi, Vi ƀan pơkuâ Kuô̆k hô̆i kô tơmâng xo mâu rơkong tơpui tối dêi mâu kăn Kuô̆k hô̆i, vâ la ngiâ kố ah ‘mâi rơnêu Luât pêi cheăng séa ngăn dêi Kuô̆k hô̆i ƀă Hô̆i đong hnê ngăn pơtroh ăm Kuô̆k hô̆i ngăn, tơbleăng a Hneăng hôp má 10, Kuô̆k hô̆i hneăng 15 la ngiâ vâ rak tơniăn tŭm mâu pơkâ séa ngăn châ pêi pro kơtăng tung tơdroăng ki ai khât.

Kăn xiâm hnê ngăn Kuô̆k hô̆i pơkâ thế, mâu ngế ki tơmâng mâu kăn ki veăng hôp athế veăng tơpui tơno tơkŭm, tơpui tơdrăng tung mâu tơdroăng ki kal, pơkâ mơ’no mâu troăng hơlâ pêi pro nhên ƀă pơxúa. Mơgêi Rôh hôp, Khu tơkŭm po kô chêh pro chiâng mơ-éa tơbleăng tâi tâng pơtroh ăm Kuô̆k hô̆i, Chin phuh, mâu khu xiâm kơvâ cheăng ƀă kong pơlê vâ teăm gum ăm tơdroăng ‘mâi pơhlêh tŭm têk Luât pêi cheăng séa ngăn dêi Kuô̆k hô̆i, Hô̆i đong hnê ngăn ƀă ‘mâi rơnêu, ‘mot tơ’nôm mâu mơ-éa luât ki ai tơdjâk.