A rôh hôp, pôa Lương Cường tối Việt Nam nhoăm ngăn mơnhông tơrŭm cheăng tiah hmâ ing nah tung hên tơdroăng ƀă Êjiptô hlối tơngah mơnhông tơrŭm cheăng péa pâ ré tơƀrê, krá kak tâ, ai pơxúa tâ nếo. Khĕn kơdeăn mâu rôh tơrŭm cheăng ƀă Êjiptô ƀă châu Phi, pôa Lương Cường -  Kăn xiâm hnê ngăn tơnêi têa pơkâ thế mơdêk tơpui tơno tơrá mâu kăn xiâm ƀă mâu râ, mơjiâng mâu tơdroăng ki tro luât nếo, pro hlâu ăm tơrŭm cheăng péa pâ tung tâi tâng mâu kơvâ cheăng.

Kăn xiâm hnê ngăn tơnêi têa pơkâ thế péa pâ mơdêk tơrŭm cheăng,  môi tuăn dêi rơpó tung mâu rôh hôp lâp plâi tơnêi ƀă tung kơpong, mơdêk tơpui tơno tối ăm dêi rơpó túa pêi cheăng kơvâ rak tơniăn hơniâp, ối tơdế rá vâ veăng ‘no hnoăng a tơdroăng hơniâp lĕm ƀă tơniăn dêi rêm kơpong ƀă tung lâp plâi tơnêi.