Hneăng hôp tơbleăng Pơkâ ƀă tơdroăng pơkâ pêi mơnhông Rơ’jíu Việt Nam chiâng kơ koan hlá tơbeăng xiâm, rơkê, hmâ, hlê plĕng, troh hơnăm 2030 cho rơ’jíu rơdêi dêi kơpong Châu Á – Thái Bình Dương ƀă troh hơnăm 2045 châ tơxâng ƀă kong têa ê.

Tơpui mơgêi, pôa Đỗ Tiến Sỹ, Kăn xiâm pơkuâ hnê ngăn Đảng, Kăn xiâm pơkuâ Rơ’jíu Việt Nam tối nhên, hnoăng cheăng dêi Đảng tung troăng tơmiât mơjiâng Rơ’jíu tung chal ki rơkê plĕng cho chal pơhlêh kơxô̆. Hneăng hôp pơkâ troăng tơmiât pêi nếo ăm tâi tâng, mơnhông hlá tơbeăng hên kơvâ, hên tơdroăng ƀă tơpui cho tơdroăng ki xiâm.

Tơdrêng amê hlối pơtối mơdêk ivá pơkuâ, mơnhông khu tơrŭm Đảng krá rơdêi vâ pêi châ tơdroăng púi vâ mơnhông dêi tơnêi têa tung chal nôkố.