A rôh tơdah, pôa Tô Lâm - Kăn xiâm pơkuâ hnê ngăn Đảng tối, hneăng lăm pôu dêi Khu xiâm ngăn ‘na têa kơxĭ kong têa Rusi cho mơhno ăm hlo ki tơƀrê, ai pơxúa tơdroăng tơrŭm cheăng péa pâ  malối tung tơdroăng pêi pro mâu tơdroăng tơhrâ tơrá kăn xiâm hiăng châ tơpui rơhéa pơla péa tơnêi têa.

Pôa Tô Lâm tối, cho môi tơnêi têa kĭng têa kơxĭ, vâ pêi ai tiô mâu tơdroăng pơkâ ‘na mơnhông tơnêi têa tung la ngiâ, Việt Nam thế chiâng tơnêi têa ki rơdêi ‘nôi, veăng ‘no hên hnoăng pro hơniâp lĕm, kring dêi tơnêi têa tơniăn, tơrŭm cheăng ƀă mâu kong têa ê ƀă mơnhông tơƀrê a kơpong ƀă tung lâp plâi tơnêi; pâ thế kong têa Rusi cho môi kong têa ki rơdêi hiăng hlê hên túa pêi cheăng ‘na mâu tơdroăng a têa kơxĭ kô veăng kum hlối tơrŭm ƀă Việt Nam ing tơdroăng péa pâ rơtế ai pơxúa, tơtro ƀă tơrŭm krá sap ing nah ƀă cho kong têa tơrŭm tung tŭm tơdroăng cheăng pơla péa pâ.