Tâng vâ tơmâng bài 1 po a kố:

https://vov4.vov.vn/xodang/todroang-neo-ai-pole-pola-thoi-su-xa-hoi/mau-bai-kpi-iva-pohleh-sap-ing-khanh-hoa-troh-lap-tonei-tea-bai-1-khanh-hoa-dja-troang-ahdroi-tung-xua-kpi-sap-ing-pei-tio-hma-troh-a-todang-khat-496630.vov4

A kong pơlê Khánh Hòa, Kơ’nâi lối 5 khế xúa KPI - Kơlo vê ngăn ki tơƀrê lơ ôh tơdroăng cheăng - ăm hlo, KPI ôh tá tot to a mâu kơxô̆ ki ‘măn a kơtâ um kơmăi vi tĭnh mế ối cho loăng rêk hdró  tơdroăng cheăng pêi hôm tơƀrê lơ ôh dêi mơngế ki pêi ƀă khu pú hên. Pôa Phạm Minh Nhựt, Kăn hnê ngăn Khu ngăn ôm hyô Nha Trang Khánh Hòa, tối:

“Tơdroăng KPI tung tâi tâng mâu kơvâ cheăng ki lâi xuân pro pơxúa tơƀrê. Ƀă kăn ƀô̆ drêng xúa mâu pơkâ, ngế ki lâi xuân thế hlê nhên tơná kal thế pêi ki klâi, pêi môi tiah lâi. Drêng ngế tơleăng hnê pêi tơdroăng cheăng hlê thế pêi ki klâi ƀă thế pro ti lâi ăm gá tro vâ kum mơngế ki xúa tơdroăng cheăng mê châ rĕng pro klêi tâ mâu hlá mơ-éa’’.

Kơnôm KPI, Kăn hnê ngăn kong pơlê hiăng hlê nhên hâi chôu pêi cheăng riân rêm hâi dêi mâu kơ koan, tíu pêi cheăng. Pơtih, Khô̆i kơ koan dêi Khu kăn pơkuâ hnê ngăn Đảng, Măt trâ̆n tơnêi têa Việt Nam kong pơlê, Đảng ủy Khối mâu kơ koan Đảng ƀă râ ủy châ 4,97 chôu; khâu mâu kăn rêm râ kong pơlê 6,13 chôu; mâu tíu pêi cheăng dêi tơnêi têa 6,11 chôu; Đảng ủy mâu cheăm, bêng 5,21 chôu; ƀă Vi ƀan kuăn pơlê rêm râ cheăm 6,17 chôu. A Khu rak ngăn kơpong cheăng kâ ƀă kơpong kơmăi kơmok kong pơlê Khánh Hòa,  Ngế pơkuâ Trần Minh Chiến ăm ‘nâi, klêi pêi pro tiô KPI, ki tơƀrê tơdroăng cheăng hiăng ăm hlo nhên môi tiah um kơchuâ:

“Klêi pêi cheăng ƀă KPI kô pro ăm hlo inhên ƀă kơxô̆, kăn ƀô̆ hlo mâu tơdroăng ‘na um kơchuâ tơdroăng pêi cheăng dêi tâi tâng kơ koan. Ƀiên chê̆ ôh tá tâk, tơdroăng cheăng thăm rế hên. Xua mê, thế mơdêk ki tơƀrê pêi cheăng ƀă tơdroăng hnê, xúa kŏng ngê̆ tơdêi tâ’’.

Kong pơlê Khánh Hòa klêi tơ’mot dế pơkâ mâu tơdroăng pêi hên: ki tâk dêi GRDP tâng riân 11% - 12%/hơnăm; GRDP/môi ngế cho dêi Top 10 tung lâp tơnêi têa; cheăm kâ kơxô̆ châ 35% GRDP; kơxô̆  ki pơ’lêh tung kơphô̆ châ 70%. Pơloăng mơnúa prôk ƀă hên há: péa tíu tơvâ ki kân ‘na mơjiâng tơmeăm khoăng (malối cho mơjiâng tơmeăm khoăng ƀă kơmăi kơmok krá kak kum khu mơdró pơ’hêh kơxô̆, mơdêk tơbrê vâ châ tơbriât cheăng chal nôkố) ƀă mơngế pêi cheăng rơkê, rơtế ƀă pơkâ mơdêk rế tơƀrê dêi kăn ƀô̆. Xua mê, KPI cho tơmeăm khoăng vâ mơnhên ƀă kơxô̆, séa ngăn tơdroăng pêi cheăng dêi mâu pơkâ mê, pro tơdroăng ki mơ-eăm chiâng tơdroăng chêh ‘măn tơdrăng. Kăn hnê ngăn Tỉnh ủy Khánh Hòa, pôa Nghiêm Xuân Thành, tối KPI kô hlối cho tơmeăm rak ngăn hlối cho tíu ki tơdjêp pơla pơkâ pêi ƀă tơdroăng hiăng klêi mê cheăng tơrêm hâi.

“Tơdroăng xúa KPI kô ăm hlo kơxô̆ mơngế pêi cheăng kal khât. Ngăn kơxô̆ chôu kô ‘nâi tíu pêi cheăng dế rơlối kăn ƀô̆ lơ ối kal mâu kăn ƀô̆, dế rơlối to lâi ngế kăn ƀô̆, rơlối a tơdroăng cheăng pêi ki lâi”.

Kong pơlê Khánh Hòa cho tíu ki pêi apoăng mê tơnêi têa cho  xiâm ki troh vâ xúa KPI kăn ƀô̆. Khu kăn ngăn mơngế pêi cheăng hiăng chêh pơkâ tơbleăng pêi cheăng KPI tơdâng tung lâp tơnêi têa sap apoăng hơnăm 2026, tơkŭm ƀă pơ’lêh kơxô̆. Drêng tơdroăng chêh ‘măn châ po ngăn tiô hâi khế, môi hồ sơ pro hrá luâ hâi pơkâ ôh pá ai xếo bú ton to a rơkong tối mơnhên, mê ai mơhno ăm hlo nhên tung kơmăi, djâ mơhno tơdroăng cheăng pêi ƀă kơ’măi chiâng tơdroăng tơ’noăng tung pêi cheăng. Ngế xiâm ngăn mơngế pêi cheăng Phạm Thị Thanh  Trà tối nhên:

“Chin phuh kô pơkâ nhên ‘na tơdroăng cheăng tối nhên mâu  tơdroăng cheăng dêi kăn ƀô̆, mâu kăn pơkuâ tíu pêi cheăng, mâu ngế pêi cheăng. Khu xiâm ngăn tơdroăng pơkâ pêi tối nhên kô mơjiâng cheăng pêi ing xiâm xúa ứng dụng kŏng ngê̆, tơkŭm KPI ƀă tơdroăng cheăng pêi pro dêi Việt Nam, rơtế ƀă hnoăng cheăng pêi, tơniăn tơbleăng ăm ‘nâi nhên, tơdrăng ƀă pơxúa khât. Kố cho xiâm vâ pêi tro tiô pơkâ, ôh tá ai xếo tuăn tơmiât râk ƀiên chê̆ plâ rơxông.”  

Cho môi tơdroăng cheăng tối tro lơ ôh, kơlo pêi cheăng tơƀrê- KPI mê Khánh Hòa dế xúa ôh tá xê to mơhno ăm hlo nhên tơdroăng cheăng pêi mê ối mơ-eăm dêi rêm tíu pêi cheăng, mơngế. Ing mê Phŏ kăn hnê ngăn Kuô̆k hô̆i Nguyễn Thị Thanh tối, ngăn mê cho  tơmeăm  ki vâ mơhnhôk môi tuăn pêi cheăng a cheăm bêng.

“Khánh Hòa cho môi tung mâu tíu pêi cheăng ki djâ troăng ahdrối tung tơdroăng mơjiâng KPI vâ tối, mơjiâng tíu pêi cheăng. Tíu ki eăng bâ tung pêi pro mâu tơdroăng ki nếo pêi tro tuăn kuăn pơlê, hlối tơ’nôm tơdroăng kal ki nếo a tơdroăng cheăng pêi pro tro tuăn kuăn pơlê tung hơnăm pơ’lêh kơxô̆”.

Sap ing cheăm troh kong pơlê, troh tơnêi têa, kơlo vê ngăn  ki tơƀrê lơ ôh tơdroăng cheăng pêi - KPI dế po mơhno mâu troăng ki nếo tung tơdroăng mơhno ki lĕm tro ƀă ki tơƀrê tơdroăng cheăng. Tung tơdroăng chêh tơbleăng ăm Khu xiâm Kal kí Hneăng hôp Đảng ƀô̆ kong pơlê Khánh Hoà rôh má 1, KPI châ mơnhên cho tơmeăm pêi cheăng ƀă kih thuâ̆t vâ chêh tối tơdroăng púi vâ; chiâng tơdroăng ki tâk rơdêi tíu xiâm Ôm hyô - Mơdró kâ a têa kơxĭ lâp plâi tơnêi. KPI châ tối nhên a 3 tơdroăng ki kal: Pêi ahdrối tung tơdroăng cheăng ‘na kăn ƀô̆; pro pơ’lêh ai pơxúa khât tung tơdroăng tối nhên, pơxá ối má to lâi; ƀă Xúa tơdrêng tơ’mô tâi tâng  tung kơmăi chêh ‘na tơdroăng kal kí, tơniăn tơdrăng, Tiô tơdroăng pêi tơdjuôm. Kố cho xuân cho tơdroăng pêi pro apoăng vâ tơdroăng cheăng pêi chêh ‘mot tung kơmăi Việt Nam achê tâ ƀă mâu pơkâ tro ‘ló tiô túa nếo, rơkê  ƀă tơƀrê.