Rôh kong mêi kân apoăng khế 9 kố nah têa hiăng lân lu hên kơpong kuăn pơlê ối, pro tơ’nhiê 240ha báu, brá alâi dêi vâ chê 600 rơpŏng kuăn pơlê, ƀă mau tơmeăm khoăng tíu pêi cheăng, troăng prôk, rơchôa tro tơhnâp. Kăn hnê ngăn Đảng ủy cheăm, pôa Phạm Văn Phương, ăm ‘nâi tơdroăng djâ kuăn pơlê lăm ối tíu tơniăn cho tơdroăng pêi pro ki ‘ló má môi vâ pơtê tơdroăng têa lân lu.

Kong pơlê chêh pro hlá mơ-éa pơkâ hdró tơdjuôm, rah tơnêi ki achê troăng kân kơxô̆ 25 ƀă tíu xiâm mơhno túa lĕm tro dêi cheăm vâ pro tíu ki pro pơlê nếo ăm kuăn pơlê, ƀă tơnêi mê rêm lô dâng 580m2, thế rak tơniăn ăm kuăn pơlê hlối ai tơnêi ối, hlối ai tơnêi  kơdrum ƀă tíu păn mơnăn mơnôa. Tâng châ kong pơlê ăm liăn, tơdroăng tơkêa bro mê kô tơbleăng pêi tơdrêng hlối vâ kum kuăn pơlê châ ai tíu ối ton ta ah, ôh tá tô tuăn troh rơnó mêi têa lân lu.