Tơdroăng pêi ki xiâm cho gu tơnêi ok pro tơbăng vâ chê 20.000m2, tung mê ai lối 18.000m2 ki ok hdi troh têa kơxĭ kung king Cam Ranh, ƀă kâng pro rơchôa ƀă hmốu xŏn lối 500m. Kố cho xiâm vâ tơbleăng mơjiâng pro hnôu ‘măn têa châu têa kơxăng ƀă têa châu tơƀai tung mâu hơnăm pơtối.

Tơdroăng tơkêa bro ai tâi tâng kơxô̆ liăn lối 150 rơtal liăn. Drêng hiăng pro klêi ah tŭm 2 tơdroăng tơkêa bro mê kô ai ivá kâi ‘măn dâng 15.000m3, tơnêi tíu pro rơdâ 12.000m2, ki xŏn ôh tá luâ 17,2m. Pro rôh má 1 tiô tối hdrối kô pro klêi tung pơla 23 khế, krê pro tíu ki hdi troh a têa kơxĭ kô pê klêi tung pơla 10 khế. Pro rôh má 2 kô tơbleăng pro tơdrêng klêi mê hlối ƀă kô pro klêi a khế 8/2026.

Tơmeăm khoăng pro mê tơngah kô chiâng hnôu kân ‘măn hên têa châu têa kơxăng ăm plông tơraih tơƀai Cam Ranh, veăng ‘no hnoăng mơnhông kơchơ mơdró têa châu têa kơxăng ƀă têa châu tơƀai ƀă tơdroăng cheăng tê mơdró logistics kơpong Nam Trung Bộ.