Tung rôh po Hneăng hôp tơpui ‘na cheăng kâ krê dêi  mơngế Việt Nam hơnăm 2025, kơxê hâi lơ 16/9, a Hà Nội, po Hôp tơpui tơno tơrá mâu kăn xiâm. Hneăng hôp veăng ai vâ chê 1 rơpâu ngế kăn xiâm tung Chin phuh, mâu khu xiâm, kơvâ cheăng, kong pơlê, mâu khu tơrŭm cheăng tung lâp plâi tơnêi, mâu ngế rơkê, khu cheăng ‘na khoa hok ƀă khu kuăn pơlê mơdró kâ rơkê tung lâp tơnêi têa.

Tối tơbleăng a rôh Hôp tơpui tơno tơrá mâu kăn xiâm, Pôa Phạm Minh Chính - Ngế pro xiâm hnê ngăn tơnêi têa púi vâ mâu khu mơdró, mâu ngế mơdró kâ rơkê rak vế pêi pro tro tiô troăng hơlâ, luât pơkâ dêi Đảng, Tơnêi têa, mơhno hiâm mơno ki lĕm tung mơdró kâ ƀă ai hnoăng cheăng ƀă pơlê pơlê pơla; rơtế ƀă Đảng, Tơnêi têa ƀă kuăn pơlê mơ-eăm pêi pro tiô troăng hơlâ tơniăn krê dêi hdroâng mơngế, chuh ngiah xah hô̆i.

‘Na hnoăng cheăng pêi ki nhên, Ngế pro xiâm hnê ngăn tơnêi têa pơkâ thế pêi tơƀrê mâu pơkâ dêi Hneăng hôp má 13, mâu Pơkâ dêi Khu xiâm Kal kí nếo tơbleăng, tung mê ai nhoăm tơdroăng xúa ứng dụng công nghệ, pơ’lêh hriăn plĕng ki nếo, mơnhông tơƀrê mâu tơdroăng mơ-eăm pêi châ tâk ki nếo.