Péa pâ tối phiu ro hdrối tơrŭm cheăng rế hía rế krá tơniăn, pơxúa păng ‘nâng pơla péa Kuô̆k hô̆i, kheăn kơdeăn tơdroăng ki xiâm kêi đeăng kơxop mơ-éa ‘’50 hơnăm tơrŭm cheăng Kuô̆k hô̆i Việt Nam - Lếo’’ kô châ in bro tung hơnăm 2025. Péa kăn xiâm pơkuâ môi tuăn pơtối djâ tơrŭm cheăng kal kí mot trâu hơngế, thăm tơrŭm tung kơvâ cheăng kâ, tê mơdró, on tơhrik, logistics; mơdêk trâm mâ kuăn pơlê, ki má lối rơxông ối nếo, vâ tơbêng tơrŭm cheăng ki má môi Việt Nam - Lếo.

Pôa Trần Thanh Mẫn, Kăn xiâm hnê ngăn Kuô̆k hô̆i pơkâ thế Lếo pro tơ’lêi hlâu tâ ăm khu tê mơdró Việt Nam mơ’no liăn cheăng. Péa pâ xuân môi tuăn tối ăm dêi pó túa ki rơkê tơtro mơjiâng Đảng, pêi kêi đeăng khu cheăng kal kí, rah xo bro lế lĕm tro khu râ kăn pêi cheăng, tung mê ai Kuô̆k hô̆i, veăng gum pro krá tơniăn tơrŭm môi tuăn Việt Nam – Lếo.