Kơxê hâi lơ 6/6, a xá kong 1187, cho Kơdrum kong kân dêi tơnêi têa Čư̆ Yang Sing, Khu xiâm rak ngăn ‘na Rui, Tŏng xo kuăn kiâ ƀă Rak ngăn kong Dak Lak tơrŭm ƀă Kơdrum kong kân tơnêi têa  Čư̆ Yang Sing, khu Rak ngăn kong tơring Krông Bông kơ’nêi 7 khu kuăn kiâ kong ki kơnía vêh rêh ối tung kong.

7 khu kuăn kiâ kong mê ai 3 to plân kong (hngăm dâng 30 kg), 1 to  plân ‘ngré ‘ngró, mơngiơk trĭng (hngăm 14kg), 1 to to tĭng chu (hngăm 8 kg) ƀă 2 to mơnhóu (hngăm 2,6kg). Mâu kuăn kiâ kong ki kơnía châ mâu kơ koan khu râ pơkuâ cheăng kong pơlê Dak Lak thế kuăn pơlê chiân ăm khu pơkuâ vâ kơ’nê vêh rêh ối tung kong. Klêi kơ’nâi to lâi khế păn a Tíu xiâm păn Rui, Tŏng kum mâu kuăn kiâ kong ƀă Rak ngăn kong Dak Lak, muâ kuăn ki mê hiăng mo rơdêi, hiăng tơniăn vâ kơ’nêi ăm vêh rêh ối tung kong nếo.