Tơbrêi tơbrĕng ôh tá ai ivá, hêng hôu, mơjo cho tơdroăng tung châ chăn dêi jâ Lê Thị Linh, ối a bêng Tân Lợi, pơlê kong kơdrâm Ƀuôn Ma Thuột, kong pơlê Dak Lak to lâi kố nah. Jâ nếo tro ngế ki ‘mêi lu lêa xo kơxô̆ liăn 80 rơtuh liăn ing zalo. Jâ hơ’muăn, lối môi khế hdrối hiăng troh a tíu pêi cheăng tơkŭm môi tíu pơlê kong kơdrâm Ƀuôn Ma Thuột pro mơ-éa pơhlêh xiâm kối xúa tơnêi. Kơxo lơ 2/10, hô sơ châ pơtroh kơ koan xo hnoăng mơhá, riên kơxô̆ liăn thế nâp. Vâ tơ’lêi hlâu , jâ kơnôm kăn ƀô̆ xo hnoăng mơhá inâi cho T. séa ngăn, tŏng gum. Ngế ki kố môi tuăn ƀă kô tiâ tung iâ hâi. péa hâi kơ’nâi mê, môi kơxô̆ zalo ki tơvaih krếo tối cho inâi T., cho kăn ƀô̆ xo hnoăng mơhá pơkâ pơtroh 80 rơtuh liăn nâp hdrối môi iâ. Tâng tối tơbleăng, jâ hiăng pơtroh tiô pơkâ dêi ngế ki krếo mê ôh tá vêh séa ngăn.

Troh kơxo lơ 6/10, kơxô̆ zalo kố pơtối krếo pơkâ pơtroh tơ’nôm 100 rơtuh liăn. Hlo nhôm xua hâi tĭng kơ koan xo hnoăng mơhá liăn ôh tá pêi cheăng, jâ krếo phôn ăm kăn ƀô̆ inâi T., mê ngế ki kố tối mơnhên ôh tá ai tơdroăng krếo zalo pơkâ pơtroh liăn nâp hnoăng mơhá. ‘Nâi tơná tro lu lêa, jâ troh a kŏng an tơbleăng tối. Jâ Linh tối:

‘’Ôh tá ‘nâi ti lâi gá ‘nâi á thế nâp hnoăng mơhá liăn tơnêi ƀă ‘nâi kăn ƀô̆ pêi cheăng ‘na hnoăng mơhá inâi tiah mê tối cho dêi tơná vâ krếo phôn, klêi mê gá chêh chư pơtroh kơxô̆ tai khoăn pơkâ á pơtroh liăn. Hlo kơxô̆ tai khoăng inâi T. á hiăng ôh tá nhô̆m lơ tơmiêt inhên séa ngăn mê pơtroh hlối. Kơnố á mơjo liăn xuân hiăng lăm a hngêi arak liăn ti tăng ngăn inâi T môi tiah ƀă kăn ƀô̆ xo hnoăng mơhá, laga vâi ôh tá môi tiah dêi pó, ƀă nhân viên hngêi arak liăn tối kơxô̆ liăn 80 rơtuh liăn hiăng nâp châ pơtroh tai khoăng a kong têa Kul’’./.

Sap apoăng hơnăm 2024 troh nôkố, Kŏng an kong pơlê Dak Lak hiăng xăm tối 25 roh tơdroăng xôi xúa kŏng ngê̆ rơxông nếo lu lêa xo tơmeăm khoăng ƀă 75 ngế tro lu lêa. Tâi tâng kơxô̆ liăn châ xo châ troh chât rơtuh liăn.

Trung tă Nguyễn Huy Nam – Kăn pơkuâ Ƀơrô gâk kring măng ƀă hbrâ, mơdât mơngế xôi xúa kŏng ngê̆ rơxông nếo kŏng an kong pơlê tối ăm ‘nâi, troăng pêi tăng pơloi dêi mâu ngế ki tối dêi tơná cho kăn ƀô̆ pêi ‘na luât môi tiah: Kŏng an, kơ koan séa ngăn kuăn pơlê, mâu ngế pêi cheăng hngêi arak liăn krếo phôn, zalo, facebook pơkâ pơtroh liăn nâp pro xôi troăng klông, nâp hnoăng liăn pro căn cươ̆k công yân, kơxô̆ liăn pơlât, ƀaoh hiêm lơ mâu khu hnoăng mơhá ki ê; krếo mơ’no liăn cheăng tíu tê mơdró điên tưh, liăn ki ôh tá xê khât. Rơtế ƀă mê mâu khu ngế xuân hmâ xúa troăng tong tai khoăn facebook, zalo chêh chưh pơtroh mâu ngế nhŏng o lu lêa mung liăn; pro mâu trâng web tê tơmeăm tơdrêng tung um tiô troăng măng tơdjêp lu lêa; pro pú hmâ ing ing chư chêh pơtroh thông klêi mê pơkâ pơtroh liăn pro mơ-éa rêh ối a kong têa ê; ăm mung liăn xo liăn rơkâ hên ing phân mêm tung măng; diâp kơxuô tơmeăm pơkâ pơtroh liăn pơto tơmeăm ing kong têa ê troh a tơnêi têa pin...Trung tă Nguyễn tă Nguyễn huy Nam, pơchân tối:

‘’Pơkâ thế kuăn pơlê thế kơchăng, kơtôa mâu tơdroăng ki kal ‘na tơdroăng rêh ối. Drêng mot tung măng pơlâ pơla ôh tá pơtroh tơdroăng kal. Drêng pơkâ tơdroăng ki klâi tơdjâk troh pơtroh liăn thế séa ngăn inhên. Đi đo séa ngăn tơdroăng ƀă tơdroăng tăng troăng pơloi dêi mâu ngế ki xôi xúa kŏng ngê̆ rơxông nếo a mâu hlá tơbeăng, rơ’jíu ki xiâm’’.

Pôa Trần Thế Việt  - Kăn phŏ pơkuâ Viettel Dak Lak tối, pơhlêh xúa kŏng ngê̆ dế ai rơdế pêi pro la ngiâ pơkâ mơdêk pêi lo hên tơmeăm, châ tơƀrê dêi tâi tâng pơlê pơla; rêm tơdroăng pêi tung mâu kơvâ dế châ pơhlêh xúa kŏng ngê̆, tơdroăng kal châ tơkŭm, mơjiâng mâu tíu ‘măn tơdroăng kal kân. Laga, pơtối mê cho mâu ngế xôi rơkê xúa măng viễn thông, măng pơlê pơla pêi pro tơdroăng lu lêa ai rế hía rế hên. Mâu ngế hmâ xúa mâu troăng xo ôh tá tro luât mâu tai khoăn zalo, facebook, viber, tơdroăng krê mơnhên inâi, kĭ sik sok...pêi pro tơdroăng lu lêa xo liăn. Vâ kơdroh mâu tơdroăng kố a măng viễn thông, kal tah lôi sim sok ƀă mơjiâng tơdroăng pêi cheăng ki chiâng xêh mơdât mâu kơxô̆ phôn ‘’sok’’ krếo phôn, chêh chư pơtroh hên roh lu lêa tơmối. Pôa Trần Thế Việt, tối ăm ‘nâi:

‘’Viettel kô hbrâ séa ngăn tối ăm ‘nâi châ sim ki lâi inâi ôh tá tro ngế ki xuá pơtroh chu a thôn, pơlê, mâu ngế pêi cheăng dêi Viettel dế rơtế mâu ngế pêi cheăng tung tôh pro pơhlêh xúa kŏng ngê̆ tung pơlê pơla tung tơdroăng pêi pro VneID ƀă pro sim tro inâi mơngế ki xúa. Kơmăi kô pro xêh dêi Viettel xuân kô séa ngăn riên mâu sim lơ krếo troh kơxô̆ phôn ki ê, kơmăi kố kô pơtroh mơnhên, tâng ơmối mơnhên sim sok krếo đi đo kô chiâng xêh mơdât tơdrêng hlối’’.

Drêng ai tơdroăng ki ôh tá tơniăn dêi ngế xôi kŏng ngê̆ a troăng măng, pakĭng tơdroăng mơdêk mâu troăng hbrâ, mơdât dêi kơ koan cheăng, kuăn pơlê kal mơdêk kơchăng, pêi tiô hnê mơhno dêi kŏng an, ôh tá pơtroh tơdroăng krê tơná kal kơchăng, pêi tiô hnê mơhno dêi kŏng an, ôh tá pơtroh tơdroăng krế tơná ví vâi chiâng ‘nâi, châ lo pakong tơdroăng kal pin. Ing mê, kum rêm ngế kơdroh ƀă hbrâ mơdât tro mâu ngế ‘mêi xo tơdroăng kal pin, pro pơxúa ăm dêi tơná vâ châ xo liăn pin, ôh tá klêh tung tơdroăng ‘’liăn hía ối tơdjâk troh châ chăn nếo’’./.