Dế rah rôe kơƀăn a tíu tê kơƀăn trung thu a troăng kân Lê Thánh Tông, pơlê kong kơdrâm Ƀuôn Ma Thuột, nâ Phùng Thị Thúy Hạnh, bêng Tân An, pơlê kong kơdrâm Ƀuôn Ma Thuột tối, mâu kuăn dêi nâ hâk ‘nâng trung thu. Hơnăm kố, hên mâu kơƀăn ‘na inâi ƀă pro lĕm mơnâ mâ ngăn, laga rơpŏng nâ xuân hâk mâu khu kơƀăn tiô khôi vâi krâ nah, ai inâi tung kơchơ mơdró:

“Drêng á rah rôe kơƀăn trung thu mê á kô rah mâu inâi ki loi tơngah, ton sap ing nah tung kơchơ mơdró vâ tơniăn ƀă pro xuân lĕm mơnâ mâ ngăn ƀă kâ kơhiâm ngeăm tâ nếo’’.

 Hiăng ton hơnăm pro kơƀăn trung thu lối 30 hơnăm, nâ Nguyễn Thị Tuyết Mai, ối a bêng Tân Lợi, pơlê kong kơdrâm Ƀuôn Ma Thuột tối ăm ‘nâi, kơƀăn trung thu hmâ ai pơkâ xúa tung iâ hâi, xua mê nâ ôh tá rôe tơmeăm môi xôh mê klâ chiâng hên xôh. Tơdroăng kố rế ví tơdroăng ki tơmeăm ôh tá châ tê tâi, rế tơniăn ki dâi lĕm kơƀăn:

“Á rôe tơ’mot tơmeăm mê cho á ôh tá rôe môi xôh, mê á rôe rêm roh rêm roh môi xua mê kơƀăn á drêng xuân xuân ối nếo vâ tơmối hmiân tuăn. Ki mê cho kơjo má môi’’.

A kơchơ kân siêu thĭ Go Ƀuôn Ma Thuột, tíu tê kơƀăn Trung thu châ kơchơ kân pro tơdjuôm kơpong tê plâi kâ vâ kơƀăn châ rak ngăn tung hyôh lĕm má môi. Pôa Bùi Văn Quân, Kăn pơkuâ kơchơ kân siêu thĭ Go Ƀuôn Ma Thuột tối ăm ‘nâi:

“Ngin, pơkuâ ki dâi lĕm ing rôe tơmeăm ƀă mơđah tơbleăng tê tơniăn hyôh ki rak ‘măn. Nôkố kơƀăn tung tơdroăng rak ‘măn sap ing 25 troh 27 đô̆ ƀă ngin tê mâu tơmeăm kơƀăn trung thu kơdroh pơkeăng ki rak ‘măn ăm lĕm’’.

Tơniăn ivá ăm mơngế rôe xúa, tơdroăng séa ngăn rak tơniăn kế kâ hdrối, tung ƀă kơ’nâi Têt Trung thu châ kong pơlê Dak Lak tơtrŏng. Pơtối mê, Vi ƀan kong pơlê hiăng mơjiâng 2 khu séa ngăn kơvâ ‘na rak tơniăn krúa lĕm kế kâ roh Têt Trung thu hơnăm 2024 a pơlê kong kơdrâm Ƀuôn Ma Thuột, pơlê kong krâm Ƀuôn Hồ ƀă mâu tơring Krông Păč, Ea Kar, Čư Kuin ƀă Lăk. Rơtế amê Kơ koan xiâm pơkuâ kơchơ mơdró kong pơlê Dak Lak ƀă mâu tơring, pơlê kong krâm, pơlê kong kơdrâm xuân mơjiâng mâu khu séa ngăn vâ teăm tơdrêng mơdât, pơxâu phâk mâu tơdroăng pro xôi tung kơvâ pêt mơjiâng, tê mơdró mâu tơmeăm tê tung roh Trung thu hơnăm kố.

Tung tơdroăng séa ngăn mâu khu hiăng tơkŭm séa ngăn ‘na kế tơmeăm pro, tơdroăng xúa kế ki rơvât kơƀăn, trếo tŏng kum pro kơƀăn, tơdroăng ki rak tơniăn krúa lĕm kế kâ tung mơjiâng pro, rak ‘măn kơƀăn; séa ngăn ‘na xiâm kối, tíu mơjiâng pro, ki dâi lĕm, hâi khế xúa dêi tơmeăm; mơ-éa đơn mơnhên, tĕm yă ƀă hía hé. Pôa Vương Minh Sơn, Kăn phŏ pơkuâ Kơ koan pơkuâ kơchơ mơdró kong pơlê Dak Lak tối ăm ‘nâi, mâu khu séa ngăn xuân hiăng tơrŭm pơtâng tối troh tíu mơjiâng pro, tê mơdró mâu pơkâ dêi luât ‘na tê mơdró tơmeăm ƀă tơniăn kruá lĕm kế kâ, tơdroăng pêi tiô pơkâ ‘na tơbleăng pơkâ tơtro, tơbleăng tơtro tơmeăm ƀă pơkâ ‘na ki dâi lĕm.

‘’Ngin hnê mơhno mâu tíu cheăng tơkŭm tung mâu mơ-éa đơn mơnhên xiâm kối mơjiâng pro. Má péa nếo, cho mơ-éa tĕm tơmeăm, tung mê thế chêh tŭm a mơ-éa, ki xiâm cho kĭ ki dâi lĕm, hâi khế xúa, hâi khế mơjiâng pro, hâi khế rak ‘măn. Tâng châ hlo pro xôi kô pơxâu phâk tro tiô pơkâ dêi luât’’.

Klêi kơ’nâi séa ngăn, troh nôkố Khu pơkuâ kơchơ mơdró kơxô̆ 1 hiăng châ hlo péa tíu tê mơdró tung pơlê kong kơdrâm Ƀuôn Ma Thuột ai tơdroăng tê mơdró tơmeăm ôh tá ‘nâi xiâm kối, tíu mơjiâng pro, mê cho: 42 tơmeăm kơƀăn trung thu (khu 500g/môi to), 50 kilô plâi tơneăng khêi têng khăng, lối 2.300 tơmeăm xah hêi vâi hdrêng tŭm túa ki ôh tá lĕm tro (pháu, xơkê, chăng, mơnĕng), ƀă tâi tâng kơnâ lối 33 rơtuh liăn. Tâi tâng tơmeăm tối kơpêng mê cho tơmeăm rôe ôh tá tro luât, ôh tá ai mơ-ea đơn, mơ-éa mơnhên ki tơtro luât. Khu hiăng tơkŭm pơxâu phâk liăn ƀă péa tíu tê mơdró kố ƀă pơkâ thế prâu tah tâi tâng kơxô̆ tơmeăm ki xôi luât.