Kơtăn kố 70 hơnăm, mâu kăn ƀô̆, khu lêng kring vế rơtế ƀă khu lêng ƀă kuăn pơlê mâu hdroâng kuăn ngo kong pơlê Gia Lai, ƀă “Kliâm mêa hiâm mơno meăm” hiăng tơrŭm tơplâ khên tơnôu, mơdêk khôi hmâ khên tơnôu dêi pâ pôa, pro chiâng ƀlêi trâng Đăk Pơ.

Ƀlêi trâng Đăk Pơ châ pơtih môi tiah Điện Biên Phủ dêi Khu tơrŭm kơpong V, cho rôh tơplâ ki kân tơ’mô ƀă tơdroăng ton nah ƀă pơxúa tung la ngiâ ki kal. Ƀlêi trâng Đăk Pơ plâ tơplong troăng prôk ki xiâm, veăng kum bro chiâng mâu ƀlêi trâng ki ó a kơpong peăng mâ hâi lo Gia Lai – Kon Tum pro tơ’lêi hlâu ăm tá ivá ƀă khu xâ vâ pơklât thế Pơhlăng athế kĭ tơkêa Genève 1954.

Ing môi tơring pơxiâm ing pêi cheăng kâ, troh nôkố hiăng hơ’lêh mơnhông ‘na cheăng kâ rêh ối pơlê pơla a kơlo ki tŭm têk, krá tơniăn. Tơdroăng rêh ối túa lĕm tro dêi Kuăn pơlê ôh tá la lâi pơtê mơdêk, mâu tơdroăng ki hơnía, ‘na túa lĕm tro châ rak vế, mơnhông.