Hâi pleăng mơheăm mơhnhôk lối 1.000 ngế kăn ƀô̆, kŏng chưk, viên chưk, đoân viên, droh rơtăm, khu lêng ƀă kuăn pơlê veăng. Hâi pleăng mơheăm “Kơto mơheăm tum Cao Nguyên” cho tơdroăng mơhnhôk tơdroăng pleăng mơheăm Tum roh má XII hơnăm 2024 ƀă dó inâi ‘’Tơdjêp mơheăm Việt’’ xua Khu tơkŭm po pleăng mơheăm Tơnêi têa pêi pro.

Tung hâi po pleăng mơheăm kố, khu tơkŭm po hiăng tơdah 520 tơdrong mơheăm tơniăn ƀă hiăng pơtroh Hngêi pơkeăng kân kong pơlê Gia Lai ƀă Hngêi pơkeăng Kuân y 211 vâ gum tung tơdroăng thâ pơlât, pơlât mâu ngế tamo châi. Tơdroăng pleăng mơheăm khêi 2024 veăng amê ai 48 kong pơlê, pơlê kong kơdrâm tung lâp tơnêi têa; ki xiâm dêi tơdroăng pleăng kố cho tơdah dâng 120 rơpâu tơdrong mơheăm.