Hâi lơ 5/7, Khu pơkuâ Đảng ƀô̆ kong pơlê Gia Lai tơkŭm po hneăng hôp roh má 16 (po rơdâ). Tối tơbleăng a hneăng hôp ăm hlo, mơ’no liăn cheăng tơnêi têa a kong pơlê châ iâ, nếo bu châ 22,4% ƀă xuân dế trâm hên pá puât. Hơnăm kố, kong pơlê Gia Lai châ pơcháu 4.300 rơtal liăn kơxô̆ liăn mơ’no cheăng tơnêi têa ƀă pơcháu khât hiăng vâ chê 3.800 rơtal liăn. Laga, kơxô̆ liăn mơ’no dêi kong pơlê bu châ 22,4%.

Krê 3 tơdroăng xiâm tơnêi têa ‘na mơjiâng thôn pơlê nếo, kơdroh kơtiê ƀă mơnhông cheăng kâ - rêh ối pơolê pơla kơpong kuăn pơlê hdroâng kuăn ngo, châ sap ing 15% troh 23%. Tiô mâu kăn teăng mâ veăng Hneăng hôp, pơkâ pêi xúa tơnêi a kong pơlê tá hâi châ pơhlêh, cho xiâm kối chiâng ai tơdroăng hrá mơ’no liăn. Nôkố mâu tơdroăng tơkêa bro ki xiâm dêi kong pơlê môi tiah Tơdroăng tơkêa Troăng kân hâng lông cheăng kâ peăng mâ hâi Lo, mâu tơdroăng tơkêa bro long rơchôa hno têa, xěn tíu ối kuăn pơlê kơpong hdroâng kuăn ngo pơrá hrá xua xiâm kối kố.

Pakĭng mê, kơxô̆ liăn xúa tơnêi cho iâ tâng pơchông ƀă pơkâ pêi xuân cho xiâm kối ki kân há. Hên tơmeăm xúa kơxô̆ liăn kố châ mơjiâng pro châ tiô pơkâ, lơ hiăng pêi kêi đeăng, pơtối ôh tá ai liăn vâ chêl ăm vâi.