Kơxo lơ 5/6, xông tơpui a Leh mơhnhôk, khu râ kăn pơkuâ kong pơlê Kon Tum tối rơdêi ki kơnâ kal dêi ‘’Têt pêt loăng troh tá ah pâ Pôa Hồ’’, tung tơdroăng rak vế kong prâi ƀă châ tơƀrê kal khât ki loăng plâi djâ ăm tơdroăng rêh ối; tơdrêng amê kơbông krếo kuăn pơlê thăm pêt loăng plâi utâi utá ƀă pêt kong, veăng pro ăm tơnêi hơpok lĕm, hbrâ ví kong tô khăng khoăng ƀă chiâng kơpong ôh tá ai loăng pro kong chiâng tô ôh tá ai têa môi tiah tơdroăng pơxá dêi Hâi kong prâi lâp plâi tơnêi 5/6 hơnăm kố.

Klêi kơ’nâi leh mơhnhôk, rơtế pêt loăng plâi utâi utá, kong pơlê Kon Tum pêi pro tơdroăng pêt 3.000 ha kong. Tung mê Viƀan 10 tơring, pơlê kong kơdrâm dêi kong pơlê tŏng kum kuăn pơlê pêt vâ chê 2.800 ha ƀă lối 200 ha xua mâu khu pơkuâ kong tơdah pêt.

-Kơxo hâi lơ 5/6, a pơlê kong kơdrâm Ƀuôn Ma Thuột, kong pơlê Dak Lak hiăng mơhnhôk “Tết pêt loăng đi đo pâ Pôa Hồ”. Kố  xuân cho tơdroăng pêi pro vâ troh leh tơbâ 120 hơnăm hâi mơjiâng kong pơlê Dak Lak, veăng pê klêi tơdroăng “Pêt môi rơtal xiâm loăng drêh” xua Chin phuh mơhnhôk. Tung mâu hơnăm hdrối, rêm râ, mâu kơvâ cheăng, kong pơlê, kơ koan tíu pêi cheăng ƀă kuăn pơlê kong pơlê Dak Lak hiăng mơhnhôk pêt loăng; pêt kong vâ rak kong.

Hơnăm 2023, lâp tung kong pơlê hiăng pêt châ lối 4.500 ha kong châ lối 252% tiô pơkâ. A pơlê kong kơdrâm Ƀuôn Ma Thuột cho môi tung mâu kơphô̆ ki ai kơxô̆ loăng drêh hên má môi lâp tơnêi têa. A leh mơhnhôk Têt pêt loăng kơxo hâi lơ 5/6, mâu kăn ƀă kuăn pơlê hiăng pêt hrĭng xiâm loăng tróu drô péa pâ troăng Võ Nguyên Giáp. Klêi mơhnhôk pêt, kô ai 5 rơpâu xiâm loăng drêh kô pơtối châ pêt a mâu cheăm bêng dêi pơlê kong kơdrâm.