Tung kơmăng hâi lơ 19/7, Rơ’jíu ƀă Um Tơvi kong têa Nhuk - NHK hiăng xup mơ’no tơdroăng ki hmâ lăm tăng chêh tối, tung mê, ai mơnhên hên ‘na hnoăng cheăng ki kân dêi pôa Nguyễn Phú Trọng, Kăn xiâm pơkuâ hnê ngăn Đảng tung hnoăng cheăng mơjiâng, kring vế ƀă mơnhông tơnêi têa Việt Nam rơtế ƀă mâu hnoăng cheăng ki kal kân tung tơrŭm tơpui kâ, tơrŭm cheăng ƀă mâu kong têa tung mê ai ta kong têa Nhuk.

Tơdroăng ki hmâ chêh xo, chêh tối ‘na tơdroăng ki ai khât châ mơ’no tung Rơ’jiú-Um Tơvi ki kơnía git ‘na Kăn xiâm pơkuâ hnê ngăn Đảng tơnêi têa Việt Nam, môi tiah: um méa dêi pôa Nguyễn Phú Trọng trâm mâ, hôp ƀă khu râ kăn xiâm dêi kong têa vâi ê, môi tiah roh trâm mâ pôa Joe Biden, Kăn xiâm pơkuâ kong têa Mih, tơpui tơno ƀă pôa Tập Cận Bình-Kăn xiâm pơkuâ hnê ngăn-Kăn xiâm hnê ngăn kong têa Sinuâ, trâm mâ, tơpui tơno ƀă pôa Shinzo Abe, Ngế pro xiâm hnê ngăn kong têa Nhuk ƀă hên hĕng mâu kăn xiâm kong têa ê.

Tung tơdroăng hmâ chêh tối, xup xo mơ’no tung Um Tơvi mê ai mơnhên “Pôa Nguyễn Phú Trọng, Kăn xiâm pơkuâ hnê ngăn cho kăn xiâm ki rơkê kơnía kân, hiăng pro hên hnoăng cheăng kăn ối a kơlo ki kân. Pôa cho ngế ki kơdo mơ-eăm veăng ‘no dêi ivá mơno mơnhông ó rơdêi hneăng ki tơplâ mơdât khu ngế kâ kơluâ, kâ hơré a tơnêi têa Việt nam, khên tơnôu tơleăng, rup pơxâu phâk ƀă mâu kăn ƀô̆ ki kân tung khu xiâm pơkuâ ngăn cheăng kal kí. ‘Na tơrŭm tơpui kâ, tung pơla lâp plâi tơnêi dế tơklâ 2 khu krê, pôa xuân ối rak vế krá tơniăn troăng hơlâ ki tơrŭm po rơdâ, hên túa tơrŭm hên túa tơpui kâ, hên túa pêi cheăng, mơhno tối ‘na tơdroăng pói rơhêng vâ pro pú hmâ tung tâi tâng mâu kong têa ƀă tung kơpong dêi lâp plâi tơnêi.

‘Na tơrŭm tơpui kâ ƀă kong têa Nhuk, tơdroăng hmâ chêh xo mê ai mơđah um vêh tơbâ hneăng trâm mâ, tơpui tơno pơla Kăn xiâm pơkuâ hnê ngăn Đảng tơnêi têa pin ƀă pôa Shinzo Abe, Ngế pro xiâm hnê ngăn kong têa Nhuk hneăng hdrối. Amê, péa ngế kăn xiâm hiăng vêh mơnhên pa môi hdroh nếo kô pơtối tơrŭm cheăng trâu rơdâ pơla péa pâ.

Hlá tơbeăng Nikkei dêi Nhuk xuân hiăng chêh tối trối Rơ’jíu - Um Tơvi NHK, la ối tối tơ’nôm hnoăng cheăng ki kân dêi Kăn xiâm pơkuâ hnê ngăn Đảng tơnêi têa pin ăm hneăng ki mơnhông pêi cheăng kâ - pêi lo kế tơmeăm dêi Việt Nam, tung mê, ai tối nhên troăng hơlâ ki kân, rơdêi ai tơdjâk troh tơdroăng Việt Nam kĭ tơkêa Tơdroăng pơkâ ‘na mơdró kâ tơ’lêi hlâu ƀă hên kong têa, hnối tối nhên: “Kăn xiâm pơkuâ hnê ngăn cho ngế ki ai hnoăng kân tung mơnhông pêi cheăng kâ - pêi lo kế tơmeăm tơnêi têa Việt Nam mơnhông mơdêk ó rơdêi”.