Tiô Kŏng an kong pơlê Dak Lak tối, tung tơdế apoăng hơnăm 2024, mâu ngế ki bro xôi tung pơlê pơla a kong pơlê ai 489 rôh, kơdroh 3 rôh; tơklô̆m rơxế a troăng prôk ai 208 rôh, kơdroh 15 rôh, kơdroh 21 ngế tro rong tâng pơchông ƀă khế kố hơnăm nah. Xuân tung tơdế apoăng hơnăm, Kŏng an Dak Lak châ hlo 295 rôh ‘na kâ kơluâ liăn ngân; pơsăm tối 12 rôh bro xôi xúa kong ngê̆ rơxông nếo ƀă hên ki ê.

Tiô Thiê̆u tươ̆ng Lê Vinh Quy, Kăn pơkuâ Kŏng an kong pơlê Dak Lak, châ tơdroăng ki tối a kơpêng cho ai tơdroăng veăng kum kơhnâ, tơƀrê dêi mâu khu chêh hlá tơbeăng, drêng hmâ tối tơbleăng mâu troăng hơlâ pơkâ dêi Đảng, troăng pơkâ luât dêi tơnêi têa; tối tơbleăng ‘na hnoăng cheăng rak vế tơniăn gâk kring, tơniăn ƀă mơjiâng khu Kŏng an kuăn pơlê.

Ing tơdroăng ki tối tơbleăng dêi khu chêh hlá tơbeăng, vâ krâ nhŏng o mơdêk tơdroăng ki rơkê plĕng tung hbrâ kơchăng ƀă hlê plĕng nhên ‘na luât, kơhnâ veăng tung tơdroăng Tâi tâng kuăn pơlê rak vế pring vế Tơnêi têa.