Pôa Trần Thanh Mẫn, Kăn xiâm pơkuâ hnê ngăn Kuô̆k hô̆i ƀă Kăn pơkuâ hnê ngăn mâu ngế pêi cheăng Đảng tung Chin phuh, pôa Phạm Minh Chính, Ngế pro xiâm hnê ngăn tơnêi têa rơtế pơkuâ hneăng hôp. Xông tơpui pơxiâm po hneăng hôp, pôa Trần Thanh Mẫn, Kăn xiâm hnê ngăn Kuô̆k hô̆i tối ăm ‘nâi, Hneăng hôp má 8 ai hên tơdroăng ki má môi tung mâu hneăng hôp sap apoăng dêi Kuô̆k hô̆i hneăng má XV troh nôkố.

Kuô̆k hô̆i kô séa ngăn 39 tơdroăng xiâm, tung mê ai 29 tơdroăng xiâm ối tung tơdroăng mơjiâng luât, 10 khu tơdroăng xiâm ‘na cheăng kâ - rêh ối pơlê pơla, liăn ngân tơnêi têa; séa ngăn, tơdroăng rah xo mơngế pêi cheăng ƀă mâu tơdroăng ki ê. Tiô tối hdrối, Hneăng hôp má 8 pơxiâm po a hâi lơ 21/10 ƀă tơkŭm po tung 29 hâi, châ tơkŭm po chiâng 2 roh.

Kăn xiâm hnê ngăn Kuô̆k hô̆i tối, hneăng hôp châ pêi pro hdrối tơkŭm po hneăng hôp môi khế vâ mâu kơ koan rah chêh, séa ngăn ai hâi khế pêi pro tro tiô Luât Tơbleăng mơ-éa luât; tơdrêng amê vâ tơpui tơno, môi tuăn ‘na tơdroăng xiâm tơdroăng Hneăng hôp má 8.