Hneăng hôp mơnhên, Hneăng hôp má 7, Kuô̆k hô̆i hneăng má 15 hiăng châ tơƀrê lĕm, kêi đeăng hên kơxô̆ tơdroăng cheăng tung pái kơvâ cheăng mơjiâng luât, séa ngăn ƀă pơkâ mâu tơdroăng ki kal dêi tơnêi têa, pơtối pơhlêh nếo, tơxâng rế hía rế lĕm tro tâ pơkâ pêi pro nôkố. Tiô tối hdrối, Hneăng hôp má 8 kô pơxiâm po a hâi lơ 21/10 ƀă mơgêi a hâi lơ 28/11.

A hneăng hôp kố, tiô tối hdrối Kuô̆k hô̆i kô séa ngăn, tơbleăng ăm pêi pro 11 tơdroăng tơkêa bro luât; tơpui 12 tơdroăng tơkêa bro luât; séa ngăn mâu tơdroăng cheăng kâ – rêh ối pơlê pơla, liăn ngân tơnêi têa, séa ngăn, tơkŭm kơ-êng ƀă tiâ rơkong kơ-êng ƀă mâu tơdroăng kal ki ê. Pôa Trần Thanh Mẫn, Kăn xiâm hnê ngăn Kuô̆k hô̆i tối, kơxô̆ tơdroăng xiâm mơjiâng pro luât, séa ngăn, pơkâ mâu tơdroăng ki kal a Hneăng hôp má 8 cho kân, hên tơdroăng xiâm ki pá, tơvâ tơvân thế pơtối tơkŭm po Hneăng hôp má 8 tiô 2 roh vâ mâu kơ koan dêi Kuô̆k hô̆i tơmâng, tiâ tối mâu rơkong tơpui dêi Kăn teăng mâ Kuô̆k hô̆i ƀă dâi lĕm má môi ahdrối tơbleăng Kuô̆k hô̆i tơbleăng ăm pêi pro.