Tối tơbleăng a Hneăng hôp ăm hlo, 5 hơnăm hdrối, tơdroăng tơ’noăng khŏm ƀlêi chiâng hiăng mơdêk ki tơƀrê, hnoăng cheăng ki kal dêi khu lêng kring vế kong pơlê Kon Tum tung pêi pro hnoăng cheăng lêng, gâk kring, mơjiâng kơpong hbrâ mơdât krá rơdêi. Kăn ƀô̆, lêng dêi khu lêng kring vế kong pơlê hiăng kum kuăn pơlê lối 19 rơpâu hâi pêi cheăng, mơjiâng bro 90 toăng hngêi tơrŭm, hngêi tơrŭm kân, hngêi khu vâi pú ƀă tâi tâng kơxô̆ liăn bro vâ chê 6 rơtal.

A hneăng hôp, tơpui tối leăng dêi 7 khu pú hên, ngế krê ki kơhnâ rơkê ƀă mâu tơdroăng ki tơpui hnê mơhno tâi hiâm mơno, trâu hơngế dêi khu pơkuâ ngăn Đảng Kon Tum, dêi Khu pơkuâ ngăn Kuân khu 5 hiăng pêi pro nhên hiâm mơno tơrŭm, tơmiât rơkê, mơ-eăm pêi klêi hnoăng cheăng dêi kăn ƀô̆, lêng kring vế kong pơlê. Hneăng hôp khĕn kơdeăn 33 khu pú hên, 57 ngế krê ki kơhnâ rơkê.