Tung mâu hơnăm hdrối mê hía nah, mâu kong pơlê kơpong tơbăng kroăng Hồng hiăng mơnhông tơƀrê, chiâng tíu ki eăng bâ tung kơpong ƀă lâp tơnêi têa. Tơmeăm mơjiâng pro tơdroăng tê mơdró mơnhông tơƀrê ƀă tâk rĕng dêi mâu túa tê mơdró nôkố mê chê tê mơdró ƀă điê̆n tưh, mâu siêu thĭ, kơchơ kân, tê mơdró kŭn, veăng pro pơ’lêh mơnhông tơƀrê kơvâ  tê mơdró dêi mâu kơpong ƀă tung lâp tơnêi têa.

Hơnăm 2023, tê rôe kế tơmeăm ăm kong têa ê lâp tung kơpong châ lối 260 rơtal dollars, hên má môi tung 6 kơpong cheăng kâ, châ 38% kế tơmeăm tê rôe ăm kong têa ê dêi lâp tơnêi têa. Kơpong tơbăng kroăng Hồng ai Pơlê kong xiâm Hà Nội, hnoăng dêi pơlê kong xiâm mê cho 1 tung 2 tíu ai kơchơ mơdró kân má môi tung lâp tơnêi têa. Kố xuân cho kơpong ki djâ troăng ahdrối ‘na kơmăi kơmok - pêi cheăng  ƀă kơmăi tiô túa nếo, tăng ‘nâi plĕng ki nếo, xúa khoa hok, kơmăi kơmok ƀă pơhlêh nếo, tơdjêp ƀă  kơpong  hiăng châ ‘no liăn mơnhông tơƀrê.