Tung 6 khế apoăng hơnăm 2024, kong pơlê Gia Lai pêi tơƀrê mơdêk tâi tâng kế tơmeăm tung kong pơlê châ lối 3%; nâp liăn châ lối 3.300 rơtal liăn; tê tơmeăm ngi kong têa ê hlo châ hên, ƀă kơxô̆ liăn châ xo 525 rơtuh dollars, châ 70% túa pơkâ plâ hơnăm; ai 3 tíu pêi cheăng râ tơring ƀă 96 to cheăm pêi klêi mâu tơdroăng pơkâ thôn pơlê nếo.

Nôkố, a kong pơlê ai lối 255 rơpâu ha loăng pêt tŭm túa châ pêt tiô mâu tơdroăng VietGAP, GlobalGAP, 4C, Organic, Rainforest Alliance, FLO ƀă 227 mah kơxô̆ kơpong pêt ăm lối 9.600 ha loăng pêt. Tơdrêng amê, ai 92 tơdroăng tơkêa păn mơnăn châ ăm phêp troăng ‘no liăn cheăng. Laga, kong pơlê ối trâm pá, môi tah: tơdroăng ki ‘no liăn pê cheăng tơdjuôm ối hrá, nếo châ lối 23% tung tâi tâng kơxô̆ liăn lối 4.300 rơtal liăn; tơdroăng ki pêt kong tá hâi châ tiô pơkâ mơ’no.

Hneăng hôp má 19 Hô̆i đong hnê ngăn kong pơlê Gia Lai po tung 3 hâi kô séa ngăn, pơkâ tơleăng ƀă 32 kơxop hlá mơ-éa pơkâ xua Khu pơkuâ ngăn Hô̆i đong kong pơlê ƀă Vi ƀan hnê ngăn kong pơlê pơtroh.