Tung to lâi măng kố nah, hên kơpong kuăn pơlê ối a tơdế pơlê kong kân Đà Nẵng hlo to on eăng plâ măng gâ. A bêng Hòa Hải, pơlê krâm Ngũ Hành Sơn, chât ngế tá mâu kŏng nhân, mố đô̆i, mâu pơkuâ cheăng a mâu kơ koan dêi mâu tíu pêi cheăng ăm tơnêi têa, mâu ngế cheăng ăm tơnêi têa, mâu vâi krâ hiăng luâ 70 hơnăm hiăng veăng gum phái tơxông, prá ngiêtvâ kơxuô kơƀăn tek, kơƀăn chưng pơtroh ăm kuăn pơlê kơpong tro têa lu peăng Kơnhŏng. Rêm to kơƀăn chưng cho hiăng kơxuô tâi hiâm mơno hơ-ui pâ ăm kuăn pơlê a peăng Kơnhŏng.

Kơxo má, jâ Thần Thị Thương, rơpŏng hngêi ối a kơchơ xiâm Hòa Cường lôi dêi tơdroăng cheăng tê tơmeăm a kơchơ, lăm rôe 50 kg phái tơxông ƀă prá ngiêt vâ rêm ngế rơtế kơxuô kơƀăn. Jâ Thương tối:

“Tâng tơdroăng mơ’no tung Rơ’jíu, a khíu hơ’nêng ‘nâng la á ôh tá ai ivá vâ gum hên môi tiah mâu ki ê, mê a rơtế ƀă vâi pú ki ê veăng kơxuô kơƀăn. Môi hni kâ drêng dế hêng klêa ó tơ’mô ƀă kâ môi kơxuô drêng phâi. Sap kơmăng hnah troh nôkố hrăng, tơchĕng hên, kơxo kố a mơdoh chôu kơtâu troh a kố vâ teăm pế chên mâu kơƀăn vâ pơtroh tung hâi kố. A khíu ‘nâng xua tơdjuôm môi mơheăm chhá’’.

Tung mâu hâi ki kố, hngêi pôa Nguyễn Thành Long, ngế tung Kâu lak ƀô̆ rơxế bán tải Đà Nẵng a bêng Hòa Hải, pơlê krâm Ngũ Hành Sơn chiâng tíu ki kuăn pơlê troh tơkŭm kơxuô, pế kơƀăn vâ pơtroh ăm kuăn pơlê peăng Kơnhŏng. Plâ hâi plâ măng, pa kĭng hngêi, a hơpiâp pế kơƀăn on koh ƀlông ƀlông. Plâ măng kuăn pơlê tung pơlê tơkôm pế kơƀăn. Pôa Đặng Tâm, mơhé hiăng lối 70 hơnăm ối a pơlê krâm Ngũ Hành Sơn xuân hrăng plâ măng ‘mâi dêi on pế kơƀăn tek vâ teăm chên troh kơxo má vâ chơ ăm kuăn pơlê ki dế trâm pá a peăng Kơnhŏng.

“Á mơhé hiăng krâ hơnăm hiăng hên la a xuân mơ-eăm veăng kơxuô kơƀăn chưng ƀă mâu vâi ngoh nâ o vâ gum ăm kuăn pơlê ki tro têa lu a mâu kong pơlê peăng Kơnhŏng. Ngin veăng pêi ing kơxêi măng hnah troh nôkố, kơxuô pế troh 11; 12 chôu kơmăng nếo vêh, hâi kô ngin kơxuô nếo’’.

Hngêi ai po koăn tê kơphế dêi pôa Nguyễn Thành Long xuân hiăng chiâng tíu ki krâm kuăn pơlê troh pơtroh tơmeăm vâ gum ăm kuăn pơlê ki tro têa lu a peăng Kơnhŏng. Pôa Nguyễn Thành Longtối tiah kố, tung hên hơnăm hdrối nah, rêm rôh Đà Nẵng lơ kuăn pơlê a kơpong Tơdế tơnêi têa trâm pá xua kong prâi pro ôh tá tơniăn xuân châ xo tơmeăm dêi kuăn pơlê tung lâp tơnêi têa tŏng gum.

Nôkố kuăn pơlê mâu kong pơlê peăng Kơnhŏng trâm pá, kuăn pơlê tơlo tơmeăm veăng gum. Rơtế môi mơheăm chhá “kuăn Lạc, cháu Hồng’’, ngế ki lâi xuân khéa hơ’nêng hơ-ui pâ púi vâ châ veăng hơlêm tơdroăng pá puât ƀă mâu nhŏng o kuăn pơlê ki dế trâm pá a peăng Kơnhŏng.

“Hâi hnah hiăng kơxuô châ 1.000 to kơƀăn, hâi kố kơxuô tơ’nôm 1.000 to kơƀăn nếo vâ chơ ăm peăng Kơnhŏng gum kuăn pơlê. Nhŏng o tung khu rêm ngế veăng pêi iâ. Vâi krâ nhŏng o veăng tơlo liăn vâ rôe mâu tơmeăm pro, tungkơxo ah ngin lăm a kong pơlê Yên Bái. Veăng pêi cheăng mê a mơhnhôk mâu thôn, pơlê ƀă tôh kơphô̆ ƀă vâi nâ o a bêng Hòa Hải, pơlê krâm Ngũ Hành Sơn. Ngin hâi châ pơtê, xuân ối kơxuô ƀă pế kơƀăn chưng plâ măng troh kơxo ah’’.

Tung mâu hâi ki kố, mâu tíu pro kơƀăn a Pơlê kong kân Đà Nẵng pêi hdrối cho kơxuô kơƀăn vâ kum kuăn pơlê peăng Kơnhŏng. Mâu kăn  mâu kong pơlê, pơlê kong kơdrâm, pơlê kong kân Tơdế tơnêi têa hiăng mơhnhôk kuăn pơlê veăng tơlo liăn tơmeăm khoăng gum kuăn pơlê a peăng Kơnhŏng ki trâm páxua khía mơhot kân pro kong mêi têa lân lu. Mâu khu lăm pleăng hnoăng tơná hiăng lăm veăng tŏng xo mâu ngế trâm xía vâ ƀă kơpuih mơgrúa hngêi trăng tíu ối klêi ai khía kân plong mot.

Mâu rơxế ing kơpong Tơdế tơnêi têa pơtối kơ’nâi dêi rơpó pơtăng vâ lăm ngi peăng Kơnhŏng djâ mâu tơmeăm kế kâ ƀă pêng tơdroăng tuăn pâ dêi mâu kuăn pơlê kơpong Tơdế tơnêi têa pâ troh mâu kuăn pơlê tung kơpong ki trâm pá têa lân lu a peăng Kơnhŏng, gum vâi krâ nhŏng o rĕng châ tơniăn tung rêh ối.