Chi ƀô̆ thôn Đăk Ga, cheăm tơkăng kong Đăk Nhoong, tơring Đăk Glêi, kong pơlê Kon Tum ai 2 ngế đảng viên ƀă tâi tâng to mâu ngế Jêh -  Triêng. Sap tơdroăng achê kuăn pơlê, achê mâu rơpŏng ki djâ troăng ahdrối tung mâu đảng viên, 112 rơpŏng ƀă vâ chê 360 pơ’leăng mâ mơngế thôn Đăk Ga veăng pêi mâu tơdroăng cheăng kring gak troăng tơkăng kong tơnêi têa. Ing tơdroăng hơ-ui, veăng gum dêi rơpó mơnhông  cheăng kâ rơpŏng hngêi dêi kuăn pơlê tung thôn pơtối rak vế pêi pro.

Pôa A Cu, Kăn pơkuâ hnê ngăn Chi ƀô̆ hlối pro kăn thôn ăm ‘nâi, rêm hơnăm, rêm ngế đảng viên tung chi ƀô̆ xuân tơhrâ ƀă pơkâ nhên pêi pro tơdroăng hriâm ƀă pêi tiô troăng Pôa Hồ. Tơná pôa A Cu xuân môi tiah mâu đảng viên ki ê tung chi ƀô̆ xuân hlo tơdroăng hriâm ƀă pêi tiô Pôa hnê achê hmâ, ai pơxúa:

“Rêm hâi á hriâm ƀă pêi pro tiô tơdroăng ki lĕm dêi Pôa cho pêi mâu tơdroăng ki ‘ló, ki lĕm. Hriâm ing Pôa ‘nâi kơdĭng liăn tung hrê rôe  tơmeăm rêm hâi. Klêi mê hriâm kâ, hriâm tơpui, mơhnhôk kuăn pơlê pêi cheăng mơnhông cheăng kâ dêi rơpŏng hngêi mơ-eăm hlŭn kơtiê krá tơniăn”.

Hơnăm 2023 tơbleăng chuyên đề dêi Khu kăn pơkuâ hnê ngăn Đảng kong pơlê Kon Tum ‘’Hriâm ƀă pêi pro tiô tuăn mơno, hiâm mơno, túa pêi cheăng Hồ Chí Minh ‘na tơmâng khât, veăng mơjiâng kong pơlê Kon Tum mơnhông tơƀrê rĕng ƀă krá tơniăn ton’’, mâu chi ƀô̆ cheăm kơpong kuăn ngo dêi kong pơlê Kon Tum hiăng ai hên tơdroăng hriâm tâp ƀă pêi pro tiô Pôa tơtro ƀă tơdroăng ai khât tơrêm kơpong kuăn pơlê ối.

Pôa A Vét,  kăn phŏ pơkuâ hnê ngăn chi ƀô̆, kuăn ngo Hré, thôn Vi Ô Lắk, cheăm Pờ Ê, tơring Kon Plông ăm ‘nâi, kuăn pơlê tung thôn ôh tá hlê ‘na păn mơnăn ƀă rak ngăn báu klâng, hlê iâ ‘na pêi chiâk, ngoh chêh tơdroăng mê ƀă púi vâ gum kuăn pơlê mơnhông pêi chiâk:

“Môi tiah rơkong Pôa Hồ hnê cho đảng viên thế djâ troăng lĕm ahdrối, thế prôk hdrối, pêi hdrối kuăn pơlê nếo hlo pin chiâng pêi, klêi mê vâi nếo pro ƀối. Pơxiâm ing păn mơnăn a tí tăng ngăn, tăng ‘nâi vâ hlê, hnê tối ăm kuăn pơlê ki păn ro, păn chu, thế pro kơdroăng ro chu lĕm krá tơniăn sinh hok, pôi tá ăm pro ‘mêi hyôh kong prâi, thế tơniăn pôi tá ai pơreăng tâ tú. Pêt báu klâng á tăng ‘nâi plĕng tơdroăng ki lâi pêi tơƀrê á hnê tối ăm kuăn pơlê”.

Cho môi tung mâu ngế đảng viên kuăn ngo châ khĕn kơdeăn a hneăng hôp tối mâu tơdroăng pêi pro tối Mơgêi kơxô̆ 01 dêi Khu xiâm Kal kí ‘na pơtối pêi tiô Hnê mơhno 05 dêi khu xiâm kal kí “mơdêk hriâm ƀă pêi pro tiô tuăn mơno, tơdroăng ki ki lĕm, túa pêi cheăng Hồ Chí Minh “hơnăm 2023-2024 xua Khu kăn pơkuâ hnê ngăn Đảng kong pơlê Kon Tum tơkŭm po drêng troh kot mâ Pôa  Hồ khế 5 kố nah, pôa A Huế, kăn  phŏ pơkuâ hnê ngăn Chi ƀô̆ hlối pro kăn thôn A Huế, kuăn ngo Rơteăng, pơlê kon Nhên, cheăm Đăk Ruồng ăm ‘nâi:

“Hriâm ƀă pêi pro tiô hiâm mơno túa pêi cheăng Hồ Chí Minh, tơná pôa xuân hiăng mơhnhôk kuăn pơlê mơjiâng klêi thôn pơlê ki pêi cheăng tiô túa nếo. Tơná pôa lăm mơhnhôk kuăn pơlê veăng gum hâi pêi cheăng dêi rơpó, pro tíu ki lĕm a kơpong Kuât, mơhnhôk kuăn pơlê ‘mâi rơnêu troăng prôk. Pêt loăng pakĭng troăng kân xiâm môi tiah mâu troăng tung thôn. Hlo ki khât nôkố a kuăn pơlê ôh tá plong kol môi tiah ton nah”.

Sap tơdroăng hriâm ƀă pêi tiô troăng rơhlâ Pôa Hồ, 3 hơnăm hdrối đảng viên a mâu tơring, cheăm dêi kong pơlê Kon Tum hiăng pro klêi lối 800 túa tŏng gum, tơveăng dêi tơpó mơnhông cheăng kâ, ‘mâi rơnêu kơdrum deăng, tah túa tơlá ôh tá tro... Mâu túa pêi pro mê lối 6.300 hdroh rơpŏng kuăn ngo kơtiê ƀă lối 3.300 hdroh rơpŏng kơtiê châ kum hdrê, liăn, hriâm kih thuât vâ mơ-eăm mơnhông cheăng kâ.

Pôa Phạm Hải Châu, Kăn phŏ pơkuâ hnê ngăn tơring Ngọc Hồi ăm ‘nâi, Đảng ƀô̆ tơring đi đo ‘nâi nhên tơdroăng hriâm ƀă pêi pro tiô Pôa cho tơdroăng cheăng kal kí xiâm má môi. Kố cho ki kal châ pêi pro, pơhlêh  pơlê cheăm kuăn ngo ki ai vâ chê 60% ngế kuăn pơlê dêi tơring.

“Tơdroăng pêi pro tiô Pôa hiăng mơnhông tung pêi pro ƀă pro ki xiâm môi tuăn, môi mơno mơ-eăm tung tâi tâng Đảng ƀô̆ pêi tơdroăng cheăng kal kí, cheăng kâ-rêh ối, cheăng lêng kring tơniăn ƀă mơjiâng Đảng ƀă tơdroăng kal kí. ‘Mâi mơnhông tuăn loi dêi kuăn pơlê ƀă Đảng. Tơdroăng tơkŭm pêi pro ƀă hriâm tâp tiô tuăn mơno ki lĕm, túa pêi cheăng Hồ Chí Minh hiăng pêi trâu tâ hiăng ai hên túa pêi cheăng, túa pêi ki tro ‘ló, tơƀrê châ ‘nâi ƀă po rơdâ’’.

Tơbleăng lâp luô tơdroăng hriâm ƀă pêi pro tiô troăng ki lĕm Pôa Hồ, mâu Chi ƀô̆ a cheăm kơpong kuăn ngo kong pơlê Kon Tum hiăng ai hnoăng veăng ‘no ki kal tung pêi pro mâu pơkâ mơnhông Đảng ƀô̆ kong pơlê Kon Tum, mê cho: mơnhông tơƀrê tung mơjiâng thôn pơlê cheăng kâ rêh ối tiô túa nếo, xăm kơtiê krá tơniăn; pêi tơƀrê Tơdroăng mơhnhôk “Pro pơhlêh tuăn tơmiêt túa pêi cheăng dêi kuăn ngo, pro ăm kuăn ngo  mơ-eăm pêi cheăng vâ hluăn kơtiê krá tơniăn”... Tơdroăng pơtối rak túa lĕm tro tung hriâm tâp ƀă pêi pro tiô tuăn mơno ki lĕm, túa pêi cheăng Hồ Chí Minh dêi đảng viên ối pro mơhnhôk hên ngế vâ pêi pro ‘na ki pơxúa, ki kal dêi tơdroăng hriâm ƀă pêi pro tiô Pôa a kơpong kuăn ngo kong pơlê Kon Tum.