*** Tâng tối pôa Nguyễn Phú Trọng, Kăn xiâm pơkuâ hnê ngăn Đảng kơtê i hiâm, kăn ƀô̆, đảng viên ƀă mâu râ kuăn pơlê kong pơlê Tiền Giang khéa hơ’nêng, châi hiâm, tối kố cho tơdroăng châi kân dêi tâi tâng Đảng, tâi tâng Khu lêng, tâi tâng kuăn pơlê pin. Pôa Lê Trường Sơn, Kăn phŏ hnê ngăn Hô̆i đong Kuăn pơlê tơring Tân Phước – kơpong Đồng Tháp Mười dêi kong pơlê Tiền Giang tối:

“Á mơjo khéa hơ’nêng Kăn xiâm pơkuâ hnê ngăn Đảng, á hêng krôu. Kăn xiâm pơkuâ hnê ngăn Đảng cho xiâm loăng kân ton hơnăm tung chal nôkố, cho ngế hok tro dêi Pôa Hồ hiăng mơhno hiâm mơno, troăng tơdjâ, cho mơngế Kŏng san rak tơdroăng ki lĕm tro ‘ló. Kăn xiâm pơkuâ hnê ngăn cho ngế cheăng kal kí rak krá troăng tơmiât pêi la ngiâ, troăng prôk krá kâk ‘na pơkâ pêi plah, troăng tơmiât lĕm, mơdât tơdroăng kâ kơhveăm liăn ngân vâ rak vế tơdroăng tơmiêt tro ló, tâng tối tơdroăng pôa lêk lôi á vâ lo têa mâ hlối’’.

*** Đại đức Thích Minh Phước, ngế ki pơkuâ hngêi chuô Liên Hoa a cheăm Xuân Đông, tơring Chợ Gạo, kong pơlê Tiền Giang rơtế ƀă mâu ƀok, yah phop tung kong pơlê sĭng khéa khât drêng ‘nâi tơdroăng ngế ki ối a ko tơnêi têa hiăng prôk lêk:

"Ƀă tơná á cho 1 ngế ki khôp Phop drêng tâng tơdroăng pôa Nguyễn Phú Trọng, Kăn xiâm pơkuâ hnê ngăn cheăng Đảng hlâ lêk. Maluâ mê cho tơdroăng ki ôh tá chiâng ví sap ing nah la ƀă krê tơná á cho châi heăng khât ƀă sĭng khéa khat drêng tơnêi têa hiăng hía lôi môi ngế kăn pơkuâ ki rơkê, tơdrăng ƀă Đảng, ƀă kuăn pơlê. Pôa hiăng pêi cheăng ăm Tơnêi têa tá troh hiâm ki má mơ’nui. Cho pâ nhuô̆m khât ƀă pơ-ôu pơeăng. Á pâ đi đo rơkong tơpui dêi Pôa hiăng tối: “Tơdroăng rêh dêi kuăn mơngế bu 1 xôh tê, athế reh ối tiah lâi ăm ai pơxúa vâ pôi tá châi heăng, khéa hơ’nêng ‘na mâu tơdroăng ki tơná pêi pro ôh tá tro. Liăn ngân hên vâ bro klâi? Hlâ ai kơbố há chiâng djâ tơvế. Tơdroăng ki lĕm mê nếo cho tơdroăng ki tĭng kơnía má môi”. Maluâ Pôa hiăng prôk lêk hiăng pơ’lâng kuăn pơlê Việt Nam vâ vêh dêi ƀă tơnêi ki nôu rơnêh la hnoăng cheăng kăch măng ƀă mâu rơkong tơpui tối ki kơnía git rơkê plĕng dêi pôa ‘măn chôu ăm kuăn pơlê rơxông nôkố ƀă tung xo ah hmôi kô chôu vế đi đo. Pâ tu ko tơná a châ pôa Nguyễn Phú Trọng, Kăn xiâm pơkuâ hnê ngăn cheăng Đảng”.

*** Tơmiât ‘na pôa Nguyễn Phú Trọng, Kăn xiâm pơkuâ hnê ngăn Đảng, pôa Nguyễn An Chiến, đảng viên hiăng pơtê cheăng xua hơnăm hiăng krâ a bêng Cốc Lếu, pơlê kong kơdrâm Lào Cai tối, pôa Nguyễn Phú Trọng cho môi ngế hok tro ki rơkê má môi dêi Pôa Hồ Chí Minh, Kăn xiâm hnê ngăn tơnêi têa hneăng apoăng, cho môi ngế kŏng sản ki khât ‘nâng, môi rơxông pêi cheăng tâi ivá tơná xua tơdroăng ki kân lĕm dêi Đảng, pleăng ăm tơnêi têa, hdroâng mơngế. Ki rơhêng vâ tối, tung tơdroăng pêi cheăng dêi tơná, pôa Nguyễn Phú Trọng cho môi tung mâu kăn pơkuâ nôkố ki rơkê má môi tung tơdroăng hbrâ, mơdât kâ kơhveăm liăn ngân, tơdroăng ki ôh tá lĕm tro.

“Drêng tâng tối pôa lêk lôi ngin tâ rơrêk, khéa mơjo drêng Đảng ƀă Tơnêi têa pin hía môi ngế kuăn ki rơkê khât, môi ngế kăn ki rơkê păng ‘nâng djâ troăng tơmiât kân, môi ngế cheăng kal kí, cheăng lêng, tơpui kâ ƀă kong têa ê rơkê tung tơdroăng cheăng kăch măng Việt Nam’’.