Riân troh mơ’nui khế 5/2024, kong pơlê Dak Lak hiăng mơ’no liăn cheăng tơnêi têa lối 1.080 rơtal liăn, châ 25% pơkâ pêi. Kơlo mơ’no liăn ngân ai tâk tâng pơchông ƀă roh kố hơnăm hdrối, laga tơdroăng châ tơƀrê xuân iâ.

Xông tơpui a roh hôp, pôa Phạm Ngọc Nghị, Kăn hnê ngăn Vi ƀan kong pơlê Dak Lak pơkâ mâu khu cheăng, kơvâ cheăng, kong pơlê thăm séa ngăn, châ hlo ƀă tah lôi teăm tơdrêng mâu pá puât, pơloăng mơnúa ăm rêm tơdroăng tơkêa bro, tơmeăm khoăng. Pakĭng mê, mâu tíu cheăng kal hbrâ tơrŭm krá tơniăn, pêi pro tơdâng tung tơdroăng tăng tơnêi, pêi kêi đeăng hô sơ, thăm pêi pro mâu tơdroăng tơkêa bro ki xiâm tơnêi têa ƀă tơmeăm koh phiu ro leh tơbâ 120 hơnăm Hâi mơjiâng kong pơlê khế 11 la ngiâ.