Roh lăm pôu pêi cheăng kố ôh tá xê to môi tơdroăng kal tơpui kâ ƀă kong têa ê mê ối mơhno tơdroăng ki nhuô̆m ƀă tơkêa dêi Rusi ƀă tơdroăng tơrŭm hên kơvâ cheăng ƀă Việt Nam. Tơdrêng amê, roh lăm pôu pêi cheăng xuân mơhno Việt Nam veăng pêi pro troăng tơpui kâ ƀă kong têa ê tiô hiâm mơno tơniăn krê, pơkuâ xêh, pro chiâng hên kơvâ cheăng, hên troăng tơrŭm, pro pơxúa tơi têa, hdroâng mơngế ƀă veăng kum tung hơniâp lĕm, tơniăn tung lâp plâi tơnêi.

Tung roh lăm pôu pêi cheăng dêi pôa Putin, Kăn xiâm pơkuâ kong têa Rusi, khu râ kăn pơkuâ péa tơnêi têa kô tơpui tơno ƀă mơnhên troăng tơrŭm cheăng Khu tơrŭm cheăng ton xŏn tŭm têk troh hơnăm 2030, mơnhên tâ mâu kơvâ tơrŭm cheăng ki xiâm, ing cheăng kâ, tê mơdró, cheăng lêng gâk kring, on tơhrik, khoa hok kŏng ngê̆ troh hnê hriâm, khôi túa lĕm tro, tơpui kâ kuăn pơlê. Mâu pơkâ xiâm ton xŏn ƀă pơkâ pêi ki nhên kô châ pêi pro, rak tơniăn tơdroăng mơnhông krá tơniăn ƀă châ tơƀrê dêi tơrŭm cheăng pơla péa pâ tung la ngiâ.