Hâi lơ 30/5, khu râ kăn pêi cheăng hriăn plĕng mơ-éa ki kal Hneăng hôp má XIV dêi Đảng xua pôa Nguyễn Xuân Thắng, Kăn hnê ngăn Hô̆i đong lĭ luâ̆n Tơnêi têa, Kăn pơkuâ Hok viê̆n Chĭn trĭ Kuô̆k ya Hồ Chí Minh, Hnê mơhno má môi Khu iâ ngế hriăn plĕng mơ-éa ki kal, kăn tôh rah chêh Mơ-éa ki kal Hneăng hôp má XIV pơkuâ djâ pêi cheăng ƀă Khu hnê mơhno má môi Khu pơkuâ hnê ngăn cheăng Đảng pơlê kong kân Hải Phòng.

A roh pêi cheăng, pôa Nguyễn Xuân Thắng kheăn kơdeăn hiâm mơno pơhlêh nếo, khên tơmiât, khên pêi, mơ-eăm tơkâ hluâ tŭm tơdroăng pá puât, pơloăng mơnúa dêi Đảng ƀô̆, khu râ kăn pơkuâ ƀă kuăn pơlê pơlê kong kân Hải Phòng. Pôa pơkâ thế pơlê kong kân Hải Phòng pơtối tơkŭm pơkuâ, hnê mơhno vâ kêi đeăng a kơlo kân má môi mâu pơkâ ki Pơkâ Hneăng hôp Đảng ƀô̆ pơlê kong kân roh má XVI hiăng pơkâ mơ’no; mơdêk tơdroăng ki dâi lĕm tung tơdroăng rêh ối dêi kuăn pơlê; thăm tơdjêp kơpong ƀă veăng châ tơƀrê tung mâu tơdroăng cheăng kâ; ing mê, pêi pro ƀlêi trâng pơkâ pêi troh hơnăm 2030, djâ Hải Phòng chiâng pơlê kong kân kơmăi kơmok tiô rơxông nếo, rơkê, krá tơniăn, mơnhên hnoăng mơnhông dêi tơnêi têa.