A hneăng hôp, kuăn pơlê Dak Lak tối tiah kố, hên tơdroăng tơdjâk troh ‘na rêh ối kuăn pơlê mê cho: tơdroăng xo tơvêh tơnêi ôh tá tơbleăng ăm ‘nâi tơdrăng, hrá pêi pro chêl thiăn liăn drêng xo tơnêi kuăn pơlê,  pro pá tung pro hlá mơ-éa pơhlêh xúa tơnêi a pơlê kong kơdrâm Ƀuôn Ma Thuột,  mơhé hiăng pâ thế hên hdroh la xuân hâi hlo tiâ  tro tơxâng, thăm nếo ai mâu kơ koan khu râ pơkuâ cheăng ki tơdjâk hâi vâ tiâ.

Pakĭng mê, kuăn pơlê Dak Lak pâ thế rêm râ, kơvâ cheăng  kal pơtối ‘no liăn ‘mâi rơnêu mâu troăng prôk tung kơphô̆ ƀă a mâu cheăm ki dế rế tơ’nhiê, tơmâng mơjiâng kâng rơchôa, hlối ngăn mơdêk kơlo tŏng gum ăm mâu kăn ƀô̆ thôn, pơlê, tôh kơphô̆; ai luât pơkâ tŏng gum ƀaoh hiêm ăm mâu kuăn ngo.