A rôh trâm mâ, tơdroăng pơkâ hdró tơmeăm khoăng tơvâ hên dêi tíu kuăn pơlê ối, hiăng chiâng xiâm ki kuăn pơlê tơpui, tối hên ƀă pâ thế. Tiô pơkâ kơxô̆ 866 dêi Ngế pro xiâm hnê ngăn Chin phuh, pơlê kong krâm Bảo Lộc ai vâ chê 4.300 ha tơnêi cho tơnêi ối tung tơdroăng pơkâ tăng ngăn vâ chiâ xo tơmeăm khoăng tung kơdâm tơnêi, pro tơmeăm ƀă xúa mâu tơmeăm tung pơla hơnăm 2021-2030 ƀă mâu tơdroăng vâ pêi troh hơnăm 2050.

Hên tơnêi kố cho dêi mâu cheăm, bêng tíu xiâm, ai krâm kuăn pơlê ối ôh tá xê to pro xơpá ăm tơdroăng rêh ối, cheăng kâ dêi kuăn pơlê mê tơdroăng mơjiâng pro tơmeăm kuăn pơlê ối, tơ’mot hên khu ‘no liăn mơnhông cheăng kâ-rêh ối dêi kong pơlê xuân pá puât há.

A rôh trâm mâ, pôa Trần Đình Văn, Ngế pơkuâ khu kăn Kuô̆k hô̆i Lâm Đồng tối tiah kố, pơkâ hdró tơmeăm tung tơdâm tơnêi ối tơvâ tơvân ai hên pơkâ ki ê dêi tíu xiâm tơnêi têa ƀă kong pơlê. Tơdroăng kố pro hên tơvâ ‘na luât, pro pá vâ tung tơbleăng pêi mâu tơdroăng ki kal pêi a kong pơlê. Tơdroăng kố khu Kăn kuô̆k hô̆i hiăng tối ăm Kuô̆k hô̆i, ƀă Chin phuh ƀă Ngế pro xiâm hnê ngăn Chin phuh tung rôh hôp kố nah vâ ai troăng rơhlâ tơleăng mơnhên.