Teăng mâ khu râ kăn pơkuâ kong pơlê Dak Lak, pôa Nguyễn Tuấn Hà, Kăn phŏ hnê mơhno má môi Vi ƀan kong pơlê pơtroh rơkong rơkâu lĕm tro troh kăn ƀô̆, kŏng chưk, viên chưk, mơngế pêi cheăng dêi Rơ’jíu Việt Nam kơ koan teăng mâ kơpong Tây Nguyên tối krê châ tơƀrê tung pơla kố nah.

Kăn phŏ hnê ngăn Vi ƀan kong pơlê Dak Lak pói vâ, tung la ngiâ, Kơ koan pơtối chêh tối mâu tơdroăng ki lĕm tro, tơdrêng amê veăng mơjiâng mâu tơdroăng ki tá hâi chiâng pêi pro, kum kong pơlê rế mơnhông lĕm tâ mê nếo. Hơnăm 2024 kố, leh tơbâ 120 hơnăm mơjiâng, mơnhông kong pơlê Dak Lak, pôa Nguyễn Tuấn Hà pơkâ thế VOV Tây Nguyên tối tŭm tâ nếo ‘na mâu tơdroăng châ tơƀrê, tơdroăng pơhlêh nếo, mâu tơdroăng mơ-eăm dêi kong pơlê mơjiâng Dak Lak rế hía rế rơkê, tiô rơxông nếo, pêng păm khôi túa lĕm.